មន្ត្រីជាន់ខ្ពស់អង្គការសហប្រជាជាតិទទួលបន្ទុកប្រទេសស៊ីរីកាលពីថ្ងៃពុធ បានព្រមានអំពី«គ្រោះថ្នាក់ពិតប្រាកដនៃជម្លោះជាថ្មី និងការប្រឈមមុខដាក់គ្នាកាន់តែខ្លាំងឡើង នៅក្នុងប្រទេសដែលញាំញីដោយ           សង្គ្រាម ប៉ុន្តែក៏មានសង្ឃឹមសម្រាប់ជីវិតកាន់តែប្រសើរឡើងសម្រាប់ប្រជាជនរបស់ខ្លួន បន្ទាប់ពីការសម្រេចចិត្តរបស់សហរដ្ឋអាមេរិក និងសហភាពអឺរ៉ុប ក្នុងការដកទណ្ឌកម្ម។

លោក Geir Pedersen បានលើកឡើងពីភាពផុយស្រួយ នៅក្នុងប្រទេសពហុជាតិសាសន៍ និង «តម្រូវការបន្ទាន់ ដើម្បីដោះស្រាយការបែកបាក់ដែលកំពុងកើនឡើង។ លោកបានចង្អុលបង្ហាញអំពីអំពើហិង្សាលើជនជាតិភាគតិច Druze កាលពីចុងខែមេសា បន្ទាប់ពីការសម្លាប់រង្គាល នៅក្នុងតំបន់ដែលមានជនជាតិភាគតិចអាឡាវីត(Alawite) រស់នៅ កាលពីខែមីនា។

លោកបានថ្លែងប្រាប់ក្រុមប្រឹក្សាសន្តិសុខអង្គការសហប្រជាជាតិថា៖«បញ្ហាប្រឈមដែលប្រទេសស៊ីរីកំពុងជួបប្រទះ គឺធំធេងណាស់ ហើយគ្រោះថ្នាក់ពិតប្រាកដនៃជម្លោះជាថ្មី និងការបែកបាក់កាន់តែធ្ងន់ធ្ងរឡើង មិនទាន់ត្រូវបានដោះស្រាទនៅឡើយ»។

ប៉ុន្តែលោក Pedersen បាននិយាយថា ប្រជាជនស៊ីរីមានសុទិដ្ឋិនិយមដោយប្រយ័ត្នប្រយែងថា សេចក្តីប្រកាសរបស់លោកប្រធានាធិបតី ដូណាល់ ត្រាំ (Donald Trump) កាលពីសប្តាហ៍មុនថា សហរដ្ឋអាមេរិក នឹងដកទណ្ឌកម្ម ហើយសេចក្តីប្រកាសស្រដៀងគ្នារបស់សហភាពអឺរ៉ុប កាលពីថ្ងៃអង្គារ នឹង «ផ្តល់ឲ្យ ពួកគេនូវឱកាសប្រសើរជាងមុន ដើម្បីទទួលបានជោគជ័យលើការលំបាកដ៏ធំធេងទាំងនេះ»។

ថ្លែងតាមវីដេអូពីទីក្រុងដាម៉ាស (Damascus) លោក Pedersen បានហៅការបន្ធូរបន្ថយទណ្ឌកម្ម រួមទាំងដោយចក្រភពអង់គ្លេសកាលពីខែមុន ក៏ដូចជាការគាំទ្រផ្នែកហិរញ្ញវត្ថុ និងថាមពលពីប្រទេសអារ៉ាប៊ីសាអ៊ូឌីត កាតា និងទួរគីថា ជា«វឌ្ឍនភាពជាប្រវត្តិសាស្ត្រ»។