​អាមេរិក៖ ប្រមុខ​ការទូត​សហរដ្ឋអាមេរិក​និយាយ​ថា លោក​ប្រធានាធិបតី Joe Biden បាន​អញ្ជើញ​មេដឹកនាំ​អាស៊ីអាគ្នេយ៍​ឱ្យ​ចូលរួម​កិច្ចប្រជុំ​កំពូល​មួយ ​ដើម្បី​ពិភាក្សា​អំពី​វិបត្តិ​នៅក្នុង​សហភាព​មី​យ៉ាន់​ម៉ា ហើយ​កំពុង​ថ្លឹងថ្លែង​ការដាក់ទណ្ឌកម្ម​កាន់តែ​តឹងរ៉ឹង​លើ​យោធា​របស់​ប្រទេស​នេះ បន្ទាប់ពី​ការដណ្តើម​អំណាច​របស់​ខ្លួន​កាលពី​ខែកុម្ភៈ​។​

​លោក Antony Blinken បានធ្វើ​អត្ថាធិប្បាយ​កាលពី​ថ្ងៃ​ពុធ ​ក្នុងអំឡុងពេល​ធ្វើដំណើរ​ទៅកាន់​ប្រទេស​ម៉ាឡេស៊ី ជាទី​ដែល​លោក​បានពណ៌នា​អំពី​សមាគម​សម្រាប់​ប្រជាជាតិ​អាស៊ីអាគ្នេយ៍ហៅ​កាត់​ថា អាស៊ាន ដែលមាន​សមាជិក​ចំនួន ១០ប្រទេស ថាជាសារៈសំខាន់ចំពោះ​ស្ថាបត្យកម្ម​នៃ​តំបន់​ឥណ្ឌូ​-ប៉ាស៊ីហ្វិក​។​ ​លោក​បាន​បន្តថា ​​យើង​ទន្ទឹងរង់ចាំ​យ៉ាង​អន្ទះសាឲ្យ​មាន​កិច្ចប្រជុំ​កំពូល​ពិសេស​ ជាមួយ​អាស៊ាន​នៅ​ឆ្នាំក្រោយ​។​ ​អាស៊ាន​បាននឹងកំពុង​ដឹកនាំ​កិច្ចខិតខំ​ប្រឹងប្រែង​ការទូត ​ដើម្បី​ដោះស្រាយ​វិបត្តិ​នៅ​សហភាព​មី​យ៉ាន់​ម៉ា ជា​ប្រទេស​ដែលមាន​ភាពចលាចល​ចាប់តាំងពី ​យោធា​បាន​ផ្តួលរំលំ​រដ្ឋាភិបាល​ស៊ីវិល​ដែល​ដឹកនាំ​ ដោយជ័យលាភី​រង្វាន់​ណូបែល លោកស្រី Aung San Suu Kyi កាលពី​ថ្ងៃទី១ ខែកុម្ភៈ​។​

​ការដណ្តើម​អំណាច​បាន​ជំរុញឱ្យមាន​ការតវ៉ា និង​ការតស៊ូ​ប្រដាប់អាវុធ​ដែល​ត្រូវបាន​ជួបនឹង​ការបង្ក្រាបដោយ​ហិង្សា​។​ ​លោក Blinken បាន​និយាយថា​ ស្ថានភាព​នៅក្នុង​មី​យ៉ាន់​ម៉ា​ក្នុង​រយៈពេល ១០ខែ​ចាប់តាំងពី​រដ្ឋប្រហារ​បា​នឈានដល់​ស្ថានភាព​កាន់តែ​ធ្ងន់ធ្ងរ ដោយមានការចាប់ខ្លួន​មនុស្ស​យ៉ាងច្រើន និង​អំពើ​ហិង្សា​ប្រឆាំង​នឹង​ក្រុមបាតុករ​៕

អត្ថបទ​៖ សុខមាន