នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃពុធ (២១ ឧសភា) បានច្រានចោលនូវការជជែកវែកញែកទាំងឡាយ ជុំវិញការបែកបាក់ និងជម្លោះជាមួយរដ្ឋបាលសហរដ្ឋអាមេរិក បន្ទាប់ពីដំណើរទស្សនកិច្ចទៅកាន់តំបន់ឈូងសមុទ្រ ដោយលោកប្រធានាធិបតីអាមេរិក Donald Trump ប៉ុន្តែមិនបានចូលសំចតនៅអ៊ីស្រាអែល។

ទស្សនកិច្ចរបស់លោក Trump ទៅកាន់អារ៉ាប៊ីសាអ៊ូឌីត កាតា និងអេមីរ៉ាតអារ៉ាប់រួម បាននាំមកនូវកិច្ចព្រមព្រៀងពាណិជ្ជកម្មធំៗជាច្រើន ប៉ុន្តែក៏បានជំរុញឱ្យមានការបញ្ចេញមតិរបស់ប្រព័ន្ធផ្សព្វផ្សាយយ៉ាងទូលំទូលាយ ដោយចង្អុលបង្ហាញថា អ៊ីស្រាអែល ដែលជាសម្ព័ន្ធមិត្តជិតស្និទ្ធបំផុតរបស់ទីក្រុងវ៉ាស៊ីនតោននៅក្នុងតំបន់នេះ មិនត្រូវបានរាប់បញ្ចូលនោះទេ។

លោក Netanyahu ដែលពីមុនមិនធ្វើអត្ថាធិប្បាយជាសាធារណៈលើបញ្ហានេះ បានប្រាប់អ្នកសារព័ត៌មានក្នុងសន្និសីទមួយថា លោកបានជួបពិភាក្សាតាមទូរសព្ទជាមួយលោក Trump ប្រហែលជា ១០ថ្ងៃមុន ហើយប្រធានាធិបតីអាមេរិករូបនេះបានប្រាប់ថា "លោកប្ដេជ្ញាចិត្តពេញលេញចំពោះប្រមុខដឹកនាំ និងរដ្ឋអ៊ីស្រាអែលទាំងមូល"។

ស្របពេលមានសម្ពាធអន្តរជាតិកាន់តែខ្លាំងឡើងលើអ៊ីស្រាអែល លោក Trump បានជំរុញឱ្យបញ្ចប់សង្រ្គាមនៅតំបន់ហ្កាហ្សាយ៉ាងឆាប់រហ័ស ហើយក៏បានលើកពីការឈឺចាប់វេទនារបស់ជនស៊ីវិលនៅក្នុងដែនដីរងការឡោមព័ទ្ធនោះ ជាទីដែលការរារាំងជំនួយរបស់អ៊ីស្រាអែលអស់ពេល ១១សប្តាហ៍ បានបង្កើតវិបត្តិមនុស្សធម៌យ៉ាងជ្រៅ៕