គណៈកម្មាធិការសភាអង់គ្លេសដែលត្រួតពិនិត្យពាណិជ្ជកម្ម កំពុងកោះហៅរដ្ឋមន្ត្រីរដ្ឋាភិបាលនៃគណបក្សការងារ ៣រូប ដែលទទួលខុសត្រូវចំពោះការនាំចេញអាវុធ ទៅកាន់ប្រទេសអ៊ីស្រាអែល ដើម្បីឆ្លើយសំណួរអំពីភាពចន្លោះប្រហោងនៅក្នុងច្បាប់។

កាលពីខែកញ្ញា រដ្ឋាភិបាលចក្រភពអង់គ្លេស បានប្រកាសពីការហាមឃាត់មួយផ្នែកលើការនាំចេញអាវុធ ដើម្បីបញ្ជូនអាវុធទៅឲ្យអ៊ីស្រាអែលសម្រាប់ប្រើប្រាស់ នៅក្នុងតំបន់ហ្កាហ្សា ខណៈដែលកងកម្លាំងអ៊ីស្រាអែល បន្តការវាយប្រហាររបស់ពួកគេ លើតំបន់ឆ្នេរប៉ាឡេស្ទីននេះ។

សមាជិកសភាអង់គ្លេស មានការព្រួយបារម្ភថា ក្រុមហ៊ុនសព្វាវុធ អាចនឹងកេងប្រវ័ញ្ចផ្នែកខ្លះនៃការនាំចេញអាវុធ ដើម្បីផ្តល់សព្វាអាវុធដល់អ៊ីស្រាអែលសម្រាប់ប្រើប្រាស់ នៅក្នុងតំបន់ហ្កាហ្សា ដែលអាចបំពានលើកិច្ចសន្យាដោយរដ្ឋមន្ត្រីទាំងនោះ។

លោក Liam Byrne ប្រធានគណៈកម្មាធិការជម្រើសពាណិជ្ជកម្ម និងធុរកិច្ច បានកោះហៅរដ្ឋមន្ត្រីពាណិជ្ជកម្មលោក Douglas Alexander និងរដ្ឋមន្ត្រីពាក់ព័ន្ធមកពីក្រសួងការបរទេស និងក្រសួងការពារជាតិ ដើម្បីឆ្លើយសំណួរអំពីពាណិជ្ជកម្មអាវុធជាមួយអ៊ីស្រាអែល។

លោកបាននិយាយនៅក្នុងលិខិតមួយថា រដ្ឋមន្ត្រីទាំង ៣រូប គួរតែបញ្ជាក់ពីមូលហេតុ នៅពីក្រោយការកើនឡើងនៃសព្វាវុធដែលបានបញ្ជូនទៅអ៊ីស្រាអែល។ លើសពីនេះ លោកបានអំពាវនាវឲ្យមានការចេញផ្សាយស្ថិតិទាក់ទងនឹងចំនួនអាជ្ញាប័ណ្ណដែលបានកែប្រែ ដើម្បីបញ្ឈប់អ៊ីស្រាអែលជាអ្នកប្រើប្រាស់អាវុធទាំង  នេះ។