រដ្ឋមន្រ្តីការបរទេស និងជាទីប្រឹក្សាសន្តិសុខជាតិស្តីទីលោក Marco Rubio បាននិយាយនៅក្នុងសវនាការមួយ នៅចំពោះមុខគណៈកម្មាធិការសភាតំណាងសហរដ្ឋអាមេរិកថា អាមេរិកគួរតែចូលរួមក្នុងកិច្ចពិភាក្សាជាមួយរុស្ស៊ី ដើម្បីទប់ស្កាត់«ការគណនាខុស និងសង្គ្រាម» ប៉ុន្តែទំនាក់ទំនងទ្វេភាគីជាមិត្ត នឹងអាចស្តារឡើងវិញបាន លុះត្រាតែមានការផ្លាស់ប្តូរ។  

នៅពេលសួរថាតើវាជាការពិតដែលថា រដ្ឋលេខាធិការគ្រប់រូប ចងចាំថា សន្តិភាពកើតឡើងជាមួយសត្រូវ មិនមែនជាមិត្ត លោក Rubio បាននិយាយថា៖«ពិតមែនហើយ វាជាហេតុផលមួយក្នុងចំណោមហេតុផលដែលត្រូវតែមានកម្រិតនៃការទំនាក់ទំនងរវាងសហរដ្ឋអាមេរិក និងទីក្រុងមូស្គូ ដោយមិនគិតពីអ៊ុយក្រែន។បើនិយាយតាមត្រង់ទៅ ការគ្មានការទទួលខុសត្រូវ ក្នុងការមិនមានមហាអំណាចនុយក្លេអ៊ែរដ៏ធំបំផុតទាំងពីរនៅលើភពផែនដី ដែលមានទំនាក់ទំនងគ្នានេះ គឺជាករណីសម្រាប់រយៈពេល ៣ឆ្នាំ [ក្នុងអំឡុងពេលលោកប្រធានាធិបតី ចូ បៃដិន (Joe Biden)កាន់តំណែង។ នោះមិនមានន័យថា យើងនឹងក្លាយជាសម្ព័ន្ធមិត្ត ឬមិត្តភាពទេ លុះត្រាតែមានលក្ខខណ្ឌ ផ្លាស់ប្តូរ។ ប៉ុន្តែយ៉ាងហោចណាស់ យើងត្រូវតែអាចមានទំនាក់ទំនងជាមួយពួកគេ ដើម្បីការពារការគណនាខុស និងសង្គ្រាម»។

ប្រមុខការទូតអាមេរិករូបនេះ បានបន្ថែមថា៖«ប្រសិនបើមិនមានទំនាក់ទំនងរវាងសហរដ្ឋអាមេរិក និងរុស្ស៊ី ក្នុងឆ្នាំ ១៩៦១ នោះទេ ពិភពលោកអាចនឹងបញ្ចប់ ក្នុងអំឡុងពេលវិបត្តិមីស៊ីលគុយបាទៅហើយ»។

អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បាននិយាយនៅមុននេះបន្តិចថា ទីក្រុងមូស្គូ សន្មតថា រដ្ឋបាលអាមេរិក ដឹងពីភាពគ្មានប្រសិទ្ធភាពនៃសម្ពាធលើរុស្ស៊ី។ អ្នកស្រីក៏បានសង្កត់ធ្ងន់ថា៖«បន្ទាប់ពីផ្អាកអស់រយៈពេលយ៉ាងយូរ ទំនាក់ទំនងរវាងអាមេរិក និងរុស្ស៊ី ត្រូវបានស្ដារឡើងវិញ»។