មេដឹកនាំហិរញ្ញវត្ថុមកពីក្រុមប្រទេសប្រជាធិបតេយ្យឧស្សាហកម្មទាំង៧ (G7) កាលពីថ្ងៃពុធ (ទី២១ ខែឧសភា) បានប្រឹងប្រែងកាត់បន្ថយជម្លោះ ជុំវិញបញ្ហាពន្ធគយរបស់ប្រធានាធិបតីអាមេរិក លោក Donald Trump និងស្វែងរកចំណុចរួមមួយចំនួន ដើម្បីឲ្យវេទិកានេះបន្តដំណើរការ ខណៈដែលមានការជួបប្រជុំគ្នា នៅតំបន់ភ្នំ Rocky របស់ប្រទេសកាណាដា។

រដ្ឋមន្ត្រីក្រសួងហិរញ្ញវត្ថុ G7 បានប្រឹងប្រែងរក្សាភាពវិជ្ជមាន អំឡុងកិច្ចពិភាក្សា នៅទីក្រុង Banff ខេត្ត Alberta ដើម្បីព្យាយាមឲ្យបានឈានដល់កិច្ចព្រមព្រៀងមួយ ជុំវិញសេចក្តីថ្លែងការណ៍រួមដែលគ្របដណ្តប់លើបញ្ហាមិនមែនពន្ធគយ។

ការពិភាក្សា រួមមានការគាំទ្រ សម្រាប់អ៊ុយក្រែន ការគំរាមកំហែងពីគោលនយោបាយសេដ្ឋកិច្ចមិនយុត្តិធម៌របស់ប្រទេសនានា ហើយនិងការប្រយុទ្ធប្រឆាំងនឹងឧក្រិដ្ឋកម្មហិរញ្ញវត្ថុ និងការជួញដូរគ្រឿងញៀន។

នៅពេលត្រូវបានសួរអំពីកិច្ចប្រជុំទ្វេភាគីរបស់លោក ខណៈដែលរូបលោកចាកចេញពីកន្លែងទទួលទានអាហារពេលល្ងាច ជាមួយរដ្ឋមន្ត្រី និងប្រមុខធនាគារកណ្តាល G7 រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បានប្រាប់អ្នកសារព័ត៌មានថា «ខ្ញុំមាននូវថ្ងៃប្រកបដោយផលិតភាពខ្លាំងណាស់»។

បណ្ដាមេដឹកនាំហិរញ្ញវត្ថុ កំពុងខ្នះខ្នែងបញ្ចៀសកុំឲ្យកើតមានម្ដងទៀតនូវកិច្ចប្រជុំផ្នែកហិរញ្ញវត្ថុ G7 ពេញដោយការខ្វែងគំនិតគ្នា ដែលកាណាដាបានធ្វើជាម្ចាស់ផ្ទះ ក្នុងឆ្នាំ២០១៨ ជាពេលដែលពន្ធលើដែកថែប និងអាលុយមីញ៉ូមអាណាត្តិដំបូងរបស់លោក Trump បានធ្វើសេចក្តីថ្លែងការណ៍រួមមួយមិនអាចចេញបាន៕