ឆ្មាំព្រំដែនហ្វាំងឡង់ និយាយកាលពីថ្ងៃពុធថា ហ្វាំងឡង់បានបញ្ចប់ការសាងសង់របងកម្ពស់ ៤,៥ម៉ែត្រដំណាក់កាលដំបូងប្រវែង ៣៥គ.ម ស្ថិតនៅតាមព្រំដែនភាគខាងកើតជាមួយរុស្ស៊ី ដើម្បីបញ្ឈប់លំហូរជនអន្តោប្រវេសន៍ឆ្លងកាត់តាមវាលខ្សាច់ ។

ឆ្មាំព្រំដែនបន្តថា របងព្រំដែននេះ មានចម្រឹងដែកកម្ពស់ ៣,៥ម៉ែត្រនៅពីលើដោយបន្លាលួសកម្ពស់ ១ម៉ែត្រ ហើយនិងបំពាក់ដោយកាមេរ៉ាសុវត្ថិភាព ឧបករណ៍ចាប់សញ្ញា ឧបករណ៍បំពងសំឡេង និងអំពូលភ្លើង ។ វានឹងត្រូវបញ្ចប់ការសាងសង់នៅដំណាច់ឆ្នាំ ២០២៦ ។

ហ្វាំងឡង់ បានចាប់ផ្តើមការសាងស់ងរបងព្រំដែនប្រវែង ២០០គ.មនៃប្រវែងព្រំដែនសរុប ១.៣៤៤គ.ម កាលពីឆ្នាំមុន ជាការឆ្លើយតបនឹងការធ្វើអន្តោប្រវេសន៍ឆ្លងកាត់ព្រំដែនរុស្ស៊ីកាលពីឆ្នាំ ២០២៣ ដែលពួកគេមានជំនឿថា ត្រូវបានរៀបចំឡើងដោយចេតនាពីទីក្រុងម៉ូស្គូ ។

ទោះបីជាយ៉ាងណាក៏ដោយ រុស្ស៊ី បានច្រានចោលការរៀបចំលំហូរចូលជនអន្តោប្រវេសន៍ទាំងអស់នេះ ។

ក្រោយទំនាក់ទំនងស្ងប់ស្ងាត់អស់រយៈពេលជាច្រើនទសវត្សរ៍ជាមួយរុស្ស៊ី ហ្វាំងឡង់ បានចូលរួមជាមួយសម្ព័ន្ធមិត្តយោធាណាតូកាលពីរយៈពេល ២ឆ្នាំមុន ជាការឆ្លើយតបនឹងការវាយលុករបស់រុស្ស៊ីនៅអ៊ុយក្រែន បង្ខំឲ្យទីក្រុងម៉ូស្គូ គំរាមសងសឹកទីក្រុង Helsinki ។

នៅឆ្នាំដដែលនោះ ជនអន្តោប្រវេសន៍ប្រហែល ១.៣០០នាក់ មកពីប្រទេសទី ៣ ដូចជាប្រទេសស៊ីរី និងប្រទេសសូម៉ាលី បានធ្វើដំណើរមកដល់ព្រំដែនហ្វាំងឡង់ដោយឆ្លងកាត់ប្រទេសរុស្ស៊ី ដើម្បីសុំសិទ្ធិជ្រកកោន រហូតដល់ហ្វាំងឡង់បិទច្រកឆ្លងកាត់សម្រាប់អ្នកដំណើរចំនួន ៨កន្លែងចូលទៅកាន់រុស្ស៊ី ៕