តុលាការធម្មនុញ្ញរបស់ប្រទេសរូម៉ានី នៅថ្ងៃព្រហស្បតិ៍ (ទី២២ ខែឧសភា) បានប្រាប់ឲ្យដឹងថា ខ្លួនបានច្រានចោលជាឯកច្ឆន្ទ ចំពោះសំណើឲ្យលុបចោលលទ្ធផលនៃការបោះឆ្នោតប្រធានាធិបតី កាលពីថ្ងៃទី១៨ ខែឧសភា ដែលជ័យជម្នះជារបស់អភិបាលក្រុង Bucharest គឺបេក្ខជនកណ្ដាលនិយម លោក Nicusor Dan។

គូប្រជែងដែលរងបរាជ័យទៅពីក្រុមស្តាំនិយមជ្រុលរបស់រូម៉ានី គឺលោក George Simion ដែលបានលេចមុខឡើង ក្នុងនាមជាអ្នកនាំមុខ ក្នុងការបោះឆ្នោតជុំទី១ កាលពីថ្ងៃទី៤ ខែឧសភា បានដាក់សំណើនេះ ដោយចោទប្រកាន់ថា មានការជ្រៀតជ្រែកពីប្រទេសបារាំង និងម៉ុលដាវី។

អាជ្ញាធររៀបចំការបោះឆ្នោត និងអ្នកសង្កេតការណ៍ឯករាជ្យ បានប្រាប់ថា ការបោះឆ្នោតត្រូវបានរៀបចំឡើងយ៉ាងល្អ។ តុលាការធម្មនុញ្ញ ដែលបានលើកឡើងថា ការតវ៉ាជំទាស់របស់លោក Simion គឺគ្មានមូលដ្ឋាន នឹងអះអាងបញ្ជាក់ជាផ្លូវការនូវលទ្ធផលបោះឆ្នោតនេះ នាថ្ងៃព្រហស្បតិ៍នេះ ដោយមានលោក Dan ចូលរួម។

គួររំលឹកថា តុលាការបានលុបចោលលទ្ធផលនៃការបោះឆ្នោតប្រធានាធិបតីដំបូងរបស់រូម៉ានី កាលពី ៦ខែមុន ដោយសង្ស័យមានការជ្រៀតជ្រែកពីរុស្ស៊ី ជាការចោទប្រកាន់ដែលត្រូវបានបដិសេធដោយទីក្រុងមូស្គូ។ បេក្ខជនស្តាំនិយមជ្រុល លោក Calin Georgescu គឺអ្នកឈ្នះ នាពេលនោះ។ រូបលោកត្រូវបានហាមឃាត់មិនឲ្យចូលរួមប្រកួតប្រជែង ក្នុងការបោះឆ្នោតរៀបចំឡើងវិញ។

សម្ព័ន្ធមិត្ត និងវិនិយោគិនអ៊ឺរ៉ុបរបស់រូម៉ានី បានស្វាគមន៍ជ័យជម្នះរបស់លោក Dan លើបេក្ខជនប្រឆាំងអឺរ៉ុប លោក Simion ដែលបានហៅការលុបចោលលទ្ធផលនៃការបោះឆ្នោតដំបូង កាលពីចុងឆ្នាំមុនថា ជា «រដ្ឋប្រហារ» និងការដណ្តើមអំណាចពីលោក Georgescu៕