មនុស្សយ៉ាងហោចណាស់៤នាក់បានស្លាប់ និង១៧នាក់ទៀតកំពុងបាត់ខ្លួន បន្ទាប់ពីភ្លៀងធ្លាក់យ៉ាងគំហុក បង្កឲ្យមានបំណាក់ដីក្នុងខេត្តកួយចូវ(Guizhou)ភាគនិរតីនៃប្រទេសចិន កាលពីថ្ងៃព្រហស្បតិ៍សប្ដាហ៍នេះ ដោយយោធាត្រូវបានដាក់ពង្រាយដើម្បីជួយក្នុងកិច្ចខិតខំប្រឹងប្រែងសង្គ្រោះ។

ទូរទស្សន៍រដ្ឋ CCTV បានរាយការណ៍កាលពីថ្ងៃព្រហស្បតិ៍ថា មនុស្សពីរនាក់បានស្លាប់ក្នុងទីប្រជុំជន ឆាងស៊ី (Changshi) និងពីរនាក់ទៀតនៅភូមិ ឈីងយ៉ាង (Qingyang) ក្បែរនោះ ជាទីដែលមនុស្ស ១៩ នាក់មកពីគ្រួសារចំនួន៨ ផ្សេងគ្នាត្រូវបានជាប់ខ្លួន បន្ទាប់ពីរងការវាយប្រហារដោយបំណាក់ដី។

ក្រុមអាជ្ញាធរក៏បានចេញការព្រមានពីហានិភ័យសម្រាប់គ្រោះមហន្តរាយភូមិសាស្ត្រនៅក្នុងតំបន់ក្បែរៗនោះផងដែរ។

ប្រទេសចិនកំពុងប្រឈមនឹងរលកកម្ដៅកាន់តែខ្លាំង និងយូរជាងមុន និងភ្លៀងធ្លាក់ខ្លាំងជាញឹកញាប់ និងមិនអាចទាយទុកមុនបាន ដោយសារការប្រែប្រួលអាកាសធាតុ។ ក្រុមអាជ្ញាធរបាននិយាយថា ប្រទេសនេះងាយរងគ្រោះដោយផលប៉ះពាល់នៃការប្រែប្រួលអាកាសធាតុ និងដោយសារតែចំនួនប្រជាជនដ៏ច្រើនរបស់ខ្លួន។  

ភ្លៀងធ្លាក់ខ្លាំងកាលពីសប្តាហ៍មុននៅក្នុងខេត្ត ខ្វាងទុង(Guangdong) ភាគខាងត្បូងនៃប្រទេសចិន និងតំបន់ ក្វាងស៊ី (Guangxi) បានសម្លាប់មនុស្ស ៧ នាក់ និងបាត់ខ្លួនជាច្រើននាក់ ដោយក្រុមអាជ្ញាធរបានចេញការព្រមានសម្រាប់ភ្លៀងធ្លាក់ខ្លាំង ទឹកជំនន់នៅតំបន់ភ្នំ និងគ្រោះមហន្តរាយភូមិសាស្ត្រនៅភាគខាងត្បូងនៃប្រទេសនេះ៕