យោធាប្រទេសអាល្លឺម៉ង់ បានបង្កើតកងពលមួយក្នុងប្រទេសតំបន់បាល់ទិកនៅប្រទេសលីទុយអានី ក្នុងការឆ្លើយតបទៅនឹងការឈ្លានពានរបស់រុស្ស៊ីទៅលើអ៊ុយក្រែន។ នេះជាលើកដំបូង ដែលទីក្រុងប៊ែរឡាំង ដាក់បុគ្គលិកយោធាជាអចិន្ត្រៃយ៍នៅបរទេស ដោយឈរលើមូលដ្ឋានមួយចាប់តាំងពីការបញ្ចប់សង្រ្គាមលោកលើកទីពីរ។

ពិធីមួយ ដើម្បីដាក់ការពង្រាយនេះ បានធ្វើឡើងនៅក្នុងរដ្ឋធានី Vilnius ប្រទេសលីទុយអានី កាលពីថ្ងៃព្រហស្បតិ៍។ ប្រទេសលីទុយអានី មានព្រំប្រទល់ជាប់នឹងតំបន់ Kaliningrad របស់រុស្ស៊ី និងសម្ព័ន្ធមិត្តរបស់ខ្លួនគឺប្រទេសបេឡារុស្ស។ កងពលអាល្លឺម៉ង់មួយនេះ នឹងមានសមាជិកយោធាប្រហែល៥.០០០នាក់ រថក្រោះ Leopard 2 និងយុទ្ធោបករណ៍ផ្សេងទៀត ក្នុងពេលមានការខិតខំប្រឹងប្រែងរបស់សម្ព័ន្ធយោធាណាតូ ក្នុងការពង្រឹងការការពារសមាជិកខ្លួន។

អធិការបតីអាល្លឺម៉ង់ លោក Friedrich Merz បានថ្លែងទៅកាន់បុគ្គលិកយោធាប្រហែល៨០០ នាក់ក្នុងអំឡុងពេលពិធីនេះ។ លោក Merz និយាយថាប្រទេសរបស់លោក ដឹងពីការទទួលខុសត្រូវរបស់ខ្លួនហើយ សម្ព័ន្ធយោធា NATO អាចពឹងផ្អែកលើប្រទេសអាល្លឺម៉ង់។ លោកក៏បាននិយាយផងដែរថា គោលដៅរបស់ទីក្រុងប៊ែរឡាំង គឺផ្តល់ធនធានហិរញ្ញវត្ថុទាំងអស់ដែលចាំបាច់ដើម្បីអភិវឌ្ឍយោធាអាល្លឺម៉ង់ទៅជាកងកម្លាំងប្រដាប់អាវុធសាមញ្ញខ្លាំងបំផុតនៅអឺរ៉ុប។