ភ្នំពេញ៖ មេឃុំ និងចៅសង្កាត់ ជាស្ត្រីឆ្នើមចំនួន ៣រូប បានជាប់ជ័យលាភី ក្នុងការដឹកនាំ និងបម្រើសេវាសាធារណជូនប្រជាពលរដ្ឋ នៅក្នុងមូលដ្ឋានបានល្អ ដែលជ័យលាភីនេះ គឺធ្វើឡើងក្នុងការប្រកួតថ្នាក់ជាតិ ក្រោមការរៀបចំដោយសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន និងគាំទ្រដោយរដ្ឋាភិបាលប្រទេសកាណាដា ក្រោមគម្រោងភាពជាដៃគូសម្រាប់គំនិតច្នៃប្រឌិតរបស់ទីក្រុង លើការដឹកនាំរបស់ស្ត្រីនៅក្នុងមូលដ្ឋាន ។

 សម្រាប់មេឃុំចៅសង្កាត់ទាំង ៣រូប រួមមានជ័យលាភីលេខ១ គឺបានទៅលើលោកស្រី សោម សុខុម មេឃុំចំរើន ស្រុកសង្គមថ្មី ខេត្តព្រះវិហារ ដែលមានស្នាដៃក្នុងការអនុវត្តគម្រោងស្តីពី ការអប់រំអភិវឌ្ឍន៍កុមារតូច និងមត្តេយ្យសហគមន៍, ជ័យលាភីលេខ២ បានទៅលើលោកស្រី ឃួន សោភ័ណ្ឌ ចៅសង្កាត់ចេក ក្រុងស្វាយរៀង ខេត្តស្វាយរៀង ដែលមានស្នាដៃក្នុងការអនុវត្តគម្រោងស្តីពីគោលនយោបាយ ភូមិឃុំសង្កាត់ មានសុវត្ថិភាព និងបរិរស្ថានល្អ និងលោកស្រី អ៊ិន សាផន ចៅសង្កាត់ស្រះចក ខណ្ឌដូនពេញ រាជធានីភ្នំពេញ ដែលមានស្នាដៃក្នុងការអនុវត្តគម្រោងស្តីពី សេវាសង្គម ។ 

 លោកស្រី អ៊ិន សាផន ចៅសង្កាត់ស្រះចក បានឲ្យដឹងថា សេវាសង្គម ដែលសង្កាត់បានអនុវត្ត ហើយទទួលបានជ័យលាភីនេះ គឺបានផ្ដល់ការគាំពារសង្គម ចំពោះប្រជាពលរដ្ឋគ្រប់រូប ក្នុងសង្កាត់ ដែលជួបការលំបាក ដោយមិនមានការរើសអើង។

 គួរបញ្ជាក់ថា បច្ចុប្បន្ននៅកម្ពុជាមានឃុំ-សង្កាត់ជាង ១ពាន់ ៦រយ ហើយតាមបណ្ដារាជធានី-ខេត្ត គឺមានស្ត្រីកាន់មុខដំណែងជាប្រធានក្រុមប្រឹក្សាឃុំ-សង្កាត់ ជាមួយនឹងការលើកទឹកចិត្តបន្ថែម ដល់ស្ត្រីមានសមត្ថភាពផ្សេងៗទៀតបានចូលរួមប្រឡូកក្នុងនយោបាយ និងមានឱកាសបម្រើប្រជាពលរដ្ឋ រួមទាំងការអភិវឌ្ឍមូលដ្ឋាន ៕ អត្ថបទ បាន សុខរិទ្ធិ