តំណាងកម្មករ កម្មការិនីរោងចក្រ ដែលប្រកាន់ខ្ជាប់នូវប្រជាធិបតេយ្យ ឯករាជ្យ និងអព្យាក្រឹត បានបង្ហាញក្តីសប្បាយរីករាយ និងថ្លែងអំណរគុណប្រមុខរាជរដ្ឋាភិបាលកម្ពុជាអាណត្តិទី៧ នៃរដ្ឋសភា ដែលមានឆន្ទៈគិតគូរដល់ផលប្រយោជន៍របស់កម្មករនិយោជិតគ្រប់កាលៈទេសៈទាំងអស់ជាពិសេសការដំឡើងប្រាក់ឈ្នួលអប្បបរមាជារៀងរាល់ឆ្នាំ។
នៅក្នុងកិច្ចសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី២៣ ខែឧសភានេះ លោក ហ្វា សាលី ប្រធានសម្ព័ន្ធសហជីពជាតិ បានលើកឡើងថា គិតក្នុងរយៈពេលជាង ២០ខែកន្លងមកនេះ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅក្នុងអាណត្តិទី៧ នៃរដ្ឋសភានេះ វិស័យវាយនភ័ណ្ឌ កាត់ដេរសម្លៀកបំពាក់ ផលិតស្បែកជើង និងកាបូប បានមើលឃើញថា ពិតជាមានភាពល្អប្រសើរច្រើនជាងមុន និងមានភាពរឹងមាំ ដែលអាចទប់ទល់បានគ្រប់ឧបាយកលដែលចង់បំផ្លាញកម្ពុជា មិនថាឧបាយកលនោះមកពីខាងក្រៅ ឬនៅខាងក្នុងប្រទេសនោះទេ។
លោកបានលើកឡើងថា វិស័យឧស្សាហកម្មកាត់ដេរ ការងារនៅក្នុងវិស័យនេះ មិនមែនមានត្រឹមតែការងារជាកម្មករ-កម្មការិនីកាត់ដេរ តែមួយមុខនោះទេ ប៉ុន្តែនៅមានការងារជំនាញបច្ចេកទេសជាន់ខ្ពស់ជាច្រើនទៀត ដែលវិស័យនេះ កំពុងត្រូវការធនធានយុវជនខ្មែរឱ្យចូលរួម។ ជាក់ស្តែង ភាពរីកចម្រើននៃការបង្កើតរោងចក្រ សហគ្រាសថ្មីៗ គឺបង្ហាញពីទំនុកចិត្តវិនិយោគទុន និងកំណើនឱកាសការងារដល់ពលរដ្ឋនៅកម្ពុជា។ លោកបន្ថែមថា ទន្ទឹមនេះ ទំនុកចិត្តរបស់វិនិយោគទុននៅប្រទេសកម្ពុជា ក្នុងការពង្រីកទីតាំងផលិតកម្មថ្មីៗរបស់រោងចក្រ សហគ្រាស ដោយអាចផ្ដល់នូវអត្ថប្រយោជន៍ដោយផ្ទាល់ ដោយបង្កើតឱកាសការងារ និងប្រាក់ចំណូលដល់ប្រជាពលរដ្ឋនៅកម្ពុជា។
លោក គឹម ចាន់សំណាង ប្រធានសភាសម្ព័ន្ធសហជីពជាតិកម្ពុជា (NACC) បានឱ្យដឹងដែរថា ឆ្លងកាត់បទពិសោធន៍ជាច្រើនឆ្នាំក្នុងវិស័យកាត់ដេរនេះ ក្នុងនាមតំណាងកម្មករនិយោជិត លោកពិតជាមានភាពជឿជាក់ទៅលើអ្វីដែលជាការដឹកនាំរបស់រាជរដ្ឋាភិបាលកម្ពុជា គិតចាប់ពីអាណត្តិទី១ រហូតដល់ទី៧នេះ ពីព្រោះបានមើលឃើញថា រាជរដ្ឋាភិបាលពិតជាមានការគិតគូរ និងយកទុកដាក់ខ្ពស់ណាស់មកកាន់កម្មករ កម្មការិនី ដោយមិនរើសអើង ជាពិសេសការទាក់ទាញអ្នកវិនិយោគជាច្រើនដែលបានបន្តមកវិនិយោគនៅកម្ពុជា។
សូមបញ្ជាក់ជូនថា គិតត្រឹមខែមេសា ឆ្នាំ២០២៥នេះ វិស័យវាយនភ័ណ្ឌ កាត់ដេរសម្លៀកបំពាក់ ផលិតស្បែកជើង និងកាបូប មានសហគ្រាស គ្រឹះស្ថានសរុបចំនួន ១ ៦៥៧សហគ្រាស កម្មករនិយោជិតប្រមាណជាង ៩៧ម៉ឺននាក់ ដោយទទួលបានប្រាក់ឈ្នួលមធ្យមសរុបប្រចាំឆ្នាំ ប្រមាណ ៣,១ពាន់លានដុល្លារអាម៉េរិក៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
