ចៅក្រមសហព័ន្ធកាលពីថ្ងៃព្រហស្បតិ៍ (២២ ឧសភា) បានបន្តដីការារាំងបណ្តោះអាសន្នលើកិច្ចប្រឹងប្រែងដោយរដ្ឋបាលរបស់លោកប្រធានាធិបតីអាមេរិក Donald Trump ក្នុងការបញ្ឈប់បុគ្គលិកសហព័ន្ធរាប់សែននាក់ ដោយនិយាយថា លោកត្រូវការការអនុញ្ញាតពីសភា មុនពេលរៀបចំរចនាសម្ព័ន្ធរដ្ឋាភិបាលសហរដ្ឋអាមេរិកឡើងវិញ។

នៅក្នុងដីការបស់ខ្លួន ចៅក្រមប្រចាំតំបន់អាមេរិក លោកស្រី Susan Illston បានរារាំងទីភ្នាក់ងារនានាមិនឱ្យបញ្ឈប់ការងារទ្រង់ទ្រាយធំ ដែលជាការវាយប្រហារដ៏ធំលើផែនការរបស់លោក Trump ក្នុងការកាត់បន្ថយ ឬលុបបំបាត់ភ្នាក់ងារសហព័ន្ធជាច្រើន ក្នុងជំហានមួយដែលរង់ចាំលទ្ធផលនៃបណ្តឹងដោយសហជីព អង្គការមិនរកប្រាក់ចំណេញ និងសាលាក្រុង។

នៅថ្ងៃទី០៩ ខែឧសភា លោកស្រី Illston បានរារាំងភ្នាក់ងារប្រហែល២០ ពីការបញ្ឈប់ការងារយ៉ាងច្រើនសម្រាប់ពេល ២សប្តាហ៍ ហើយបញ្ជាឱ្យប្រគល់តំណែងឡើងវិញដល់បុគ្គលិកដែលបានបាត់បង់ការងាររួចហើយ។ ក្នុងដីកាថ្មីនាថ្ងៃព្រហស្បតិ៍នេះ លោកស្រីចៅក្រម បានបន្តផ្ដល់ការសង្គ្រោះភាគច្រើនឱ្យបុគ្គលិករដ្ឋាភិបាល ដែលមានក្នុងដីកាហាមឃាត់បណ្តោះអាសន្ន ដោយមានការកែលម្អមួយចំនួន។

ជំហាននេះក៏ទំនងជាមិនច្បាស់លាស់ដែរបន្ទាប់ពីសេចក្ដីសម្រេច ខណៈរដ្ឋបាលលោក Trump អាចប្តឹងឧទ្ធរណ៍បានភ្លាមៗ។ កម្មករសហព័ន្ធប្រហែល ២៦០.០០០នាក់ ដែលភាគច្រើនបានទទួលយកសំណើលាឈប់ដោយខ្លួនឯង ឬត្រូវបញ្ឈប់ នឹងចាកចេញពីការងារនៅចុងខែកញ្ញា ខាងមុខ ហើយទីភ្នាក់ងារជាច្រើនទៀត ត្រៀមកាត់បន្ថយដ៏ធំ ដូចជាការងារជាង ៨០.០០០មុខតំណែងនៅក្រសួងកិច្ចការអតីតយុទ្ធជន និងប្រមាណ ១០.០០០តំណែង នៅក្រសួងសុខាភិបាលអាមេរិកជាដើម៕