កាសែត Financial Times រាយការណ៍នៅថ្ងៃសុក្រ (២៣ ឧសភា) នេះថា អ្នកចរចាពាណិជ្ជកម្មរបស់លោកប្រធានាធិបតីអាមេរិក Donald Trump កំពុងជំរុញឱ្យសហភាពអឺរ៉ុប បន្ទាបពន្ធរបស់ខ្លួនជាឯកតោភាគីលើទំនិញអាមេរិក ដោយគំរាមថា ប្រសិនបើមិនមានសម្បទានបែបនេះទេ នោះប្លុកអឺរ៉ុបនឹងមិនបង្កើតវឌ្ឍនភាពក្នុងកិច្ចពិភាក្សាបញ្ចៀសពន្ធបដិការបន្ថែម ២០% របស់អាមេរិកបានឡើយ។

សារព័ត៌មាន FT បានដកស្រង់ប្រភពមិនបញ្ចេញឈ្មោះថា តំណាងពាណិជ្ជកម្មអាមេរិក លោក Jamieson Greer កំពុងរៀបចំប្រាប់ស្នងការពាណិជ្ជកម្មអឺរ៉ុប Maros Sefcovic នៅថ្ងៃសុក្រនេះថា "ឯកសារពន្យល់បកស្រាយតួលេខ" ថ្មីៗ ដែលចែករំលែកដោយទីក្រុងព្រុចសែល សម្រាប់កិច្ចពិភាក្សាពន្ធនេះ តិចជាងការរំពឹងទុករបស់អាមេរិក។ FT បន្ថែមថា សហភាពអឺរ៉ុប បាននឹងកំពុងជំរុញឱ្យមានពង្រាងក្របខ័ណ្ឌរួមគ្នាមួយសម្រាប់កិច្ចចរចាពន្ធ ប៉ុន្តែភាគីទាំងពីរនៅឆ្ងាយពីគ្នាខ្លាំងពេក។

គួរឱ្យដឹងថា អាមេរិកបានដាក់ពន្ធ ២៥% លើរថយន្ត ដែកថែប និងអាលុយមីញ៉ូមរបស់សហភាពអឺរ៉ុប ក្នុងខែមីនា និងពន្ធ ២០% ផ្សេងលើទំនិញប្លុកអឺរ៉ុបនេះក្នុងខែមេសា។ បន្ទាប់មក ទីក្រុងវ៉ាស៊ីនតោនបានបន្ថយពាក់កណ្ដាលនៃអត្រា ២០% លើទំនិញអឺរ៉ុបរហូតដល់ថ្ងៃទី០៨ ខែកក្កដា ដោយកំណត់ពេល ៩០ថ្ងៃសម្រាប់ការចរចាកិច្ចព្រមព្រៀងពន្ធដ៏ទូលំទូលាយបន្ថែមទៀត។

ជាការឆ្លើយតប សហភាពអឺរ៉ុបដែលមានប្រទេសចំនួន២៧ បានផ្អាកផែនការផ្ទាល់របស់ខ្លួនក្នុងការដាក់ពន្ធសងសឹកលើទំនិញមួយចំនួនរបស់អាមេរិក និងបានស្នើរពន្ធសូន្យ សម្រាប់ទំនិញឧស្សាហកម្មទាំងអស់រវាងភាគីទាំងពីរ៕