ក្រសួងការពារជាតិកូរ៉េខាងត្បូង បាននិយាយនៅថ្ងៃសុក្រនេះថា ពុំទាន់មានកិច្ចពិភាក្សាជាមួយទីក្រុងវ៉ាស៊ីនតោន អំពីការដកកងទ័ពអាមេរិក ចេញពីកូរ៉េខាងត្បូងទេ បន្ទាប់ពីរបាយការណ៍របស់សារព័ត៌មាន Wall Street Journal (WSJ) បានអះអាងថា ទីក្រុងវ៉ាស៊ីនតោន កំពុងពិចារណាលើការដកទ័ពមួយផ្នែក។

ដោយលើកឡើងពីមន្ត្រីការពារជាតិអាមេរិក របាយការណ៍របស់កាសែត WSJ បាននិយាយថា ទីក្រុងវ៉ាស៊ីនតោន កំពុងពិចារណាថាតើត្រូវផ្លាស់ទីទាហានប្រហែល ៤.៥០០នាក់ ចេញពីកូរ៉េខាងត្បូង ហើយដាក់ពង្រាយពួកគេ ទៅកាន់ទីតាំងផ្សេងទៀត រួមទាំងកោះ Guam ផងដែរ។

ទីក្រុងវ៉ាស៊ីនតោន ដែលជាសម្ព័ន្ធមិត្តសន្តិសុខដ៏សំខាន់រយៈពេលវែងរបស់កូរ៉េខាងត្បូង បានដាក់ពង្រាយទាហានប្រហែល ២៨.៥០០នាក់ នៅកូរ៉េខាងត្បូង ដើម្បីជួយការពារប្រឆាំងនឹងប្រទេសកូរ៉េខាងជើងដែលមានអាវុធនុយក្លេអ៊ែរនេះ។

ប៉ុន្តែប្រធានាធិបតីអាមេរិក លោក ដូណាល់ ត្រាំ បាននិយាយកាលពីឆ្នាំមុន មុនពេលឈ្នះការបោះឆ្នោតថា ប្រសិនបើលោកត្រឡប់ទៅសេតវិមានវិញ ទីក្រុងសេអ៊ូលនឹងចំណាយប្រាក់រាប់ពាន់លានដុល្លារបន្ថែមទៀត ជារៀងរាល់ឆ្នាំ សម្រាប់កងទ័ពអាមេរិកឈរជើង នៅក្នុងប្រទេសកូរ៉េខាងត្បូង។

នៅពេលត្រូវបានសួរអំពីរបាយការណ៍របស់សារព័ត៌មាន WSJ ក្រសួងការពារជាតិរបស់ទីក្រុងសេអ៊ូលបាននិយាយថា មិនទាន់មានការពិភាក្សាអ្វីទាំងអស់រវាងកូរ៉េខាងត្បូង និងសហរដ្ឋអាមេរិក ទាក់ទងនឹងការដកទ័ពអាមេរិកចេញ ពីប្រទេសនេះទេ។

សម្ព័ន្ធមិត្តទាំងពីរ កាលពីឆ្នាំមុន បានចុះហត្ថលេខាលើកិច្ចព្រមព្រៀងថ្មីរយៈពេល ៥ឆ្នាំ ស្តីពីការចែករំលែកការចំណាយលើការឈរជើងរបស់កងទ័ពអាមេរិក នៅក្នុងប្រទេសកូរ៉េខាងត្បូង ដោយទីក្រុងសេអ៊ូល បានយល់ព្រមបង្កើនវិភាគទានរបស់ខ្លួនចំនួន ៨,៣% ដល់១,៥២ សែនកោដិវ៉ុន (១,១ពាន់លានដុល្លារ) សម្រាប់ឆ្នាំ ២០២៦។