​កូរ៉េខាងជើង៖ របាយការណ៍​ថ្មី​មួយ​ពី​ក្រុម​សិទ្ធិមនុស្ស​បាន​រកឃើញ​ថា ប្រទេស​កូរ៉េខាងជើង​បាន​ប្រហារជីវិតមនុស្ស​ជា​សាធារណៈ​យ៉ាង​ហោចណាស់ ៧​នាក់​ដោយសារតែ​ការ​មើល ឬ​ចែកចាយ​វីដេអូ​ក្រុម​តារា​ចម្រៀង​កូរ៉េខាងត្បូង K-pop ក្នុង​ទសវត្សរ៍​ចុងក្រោយ​នេះ ​នេះ​បើយោង​តាម​សារព័ត៌មាន The New York Times។

​របាយការណ៍​នេះត្រូវបាន​ចេញផ្សាយ​កាលពី​ថ្ងៃ​ពុធ ដោយ​ក្រុមការងារ​យុត្តិធម៌​អន្តរកាល (Transitional Justice Working Group) ហើយ​វា​ត្រូវបាន​ផ្អែកលើ​ការសម្ភាសន៍​ជាមួយ​អ្នករត់​ចោលស្រុកជិត ៧០០នាក់​មកពី​ប្រទេស​កូរ៉េខាងជើង​។ របាយការណ៍​នេះ​បាន​ចង្អុល​ទៅសក្ខីកម្ម​នៃ​ការប្រហារជីវិត​ជា​សាធារណៈ ​ក្រោម​ការដឹកនាំ​របស់​មេដឹកនាំ​វ័យក្មេង​កូរ៉េខាងជើង​លោក Kim Jong-un ហើយ​បាន​និយាយ​ថា​ បទល្មើស​មួយ​ក្នុងចំណោម​បទល្មើស​ធម្មតា​បំផុត​គឺ "​ការមើល ឬ​ចែកចាយ​វីដេអូបទ​ចម្រៀង​របស់​កូរ៉េខាងត្បូង"​។​ ​សារព័ត៌មាន the Times បាន​រាយការណ៍​ថា លោក Kim Jong-un បាន​ហៅ​ក្រុម​តារាចម្រៀង K-pop ថា ​ជាជំងឺមហារីក​ដ៏​កាច​សាហាវ ដោយ​ត្អូញត្អែរថា ​វប្បធម៌​កូរ៉េខាងត្បូង​កំពុង​ធ្វើឱ្យ​ខូចដល់​សម្លៀកបំពាក់ ម៉ូដ​សក់ ពាក្យសម្ដី អាកប្បកិរិយារបស់​ជនជាតិ​កូរ៉េខាងជើង​។​

​អ្នកជំនាញ​ជាន់ខ្ពស់​នៃ​មជ្ឈមណ្ឌល Wilson Center លោក Jean Lee បាន​ពន្យល់​ប្រាប់​ទូរទស្សន៍ ​CNN ថា ប្រទេស​កូរ៉េខាងជើងមើលឃើញថា វា​ជាការ​គំរាមកំហែង​មួយ​សម្រាប់​យុវវ័យ ​ដោយសារតែ​ការមើល​រឿង​ភាគ​កូរ៉េខាងត្បូង និង​មើលឃើញថា តើ​ជីវិត​របស់​ប្រជា​ជន​កូរ៉េ​នៅក្រៅ​ប្រទេស​របស់​ពួកគេ​យ៉ាងណា ព្រោះពួកគេ​ឃើញ​រូបភាព​ទីក្រុង​សេ​អ៊ូ​ល ហើយ​តើ​ពួកគេ​រស់នៅ​យ៉ាងដូចម្ដេច​។​ ​យោងតាម​សារព័ត៌មាន the Times ការចែក​ចាយ​ការកម្សាន្ត​របស់​កូរ៉េខាងត្បូង​អាច​ត្រូវ​ផ្តន្ទាទោស​ប្រហារជីវិត ​ក្រោម​ច្បាប់​ដែល​បានអនុម័ត​នៅក្នុង​ប្រទេស​កូរ៉េខាងជើង​កាលពី​ឆ្នាំមុន ហើយ​កាលពី​ខែ​មុនបុរស​ម្នាក់​ដែល​បាន​រត់ពន្ធ​រឿង​ភាគ Squid Game របស់​ក្រុមហ៊ុន Netflix របស់​កូរ៉េខាងត្បូង​ទៅកាន់​ប្រទេស​កូរ៉េខាងជើង ត្រូវបាន​គេ​រាយការណ៍​ថា​ត្រូវបាន​កាត់ទោស​ប្រហារជីវិត​៕

អត្ថបទ៖ សុខមាន