ភ្នំពេញ ៖ ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់ក្នុងឱកាស ប្រកាសផ្សព្វផ្សាយសាលាបឋមសិក្សាចតុមុខ ជាសាលារៀនគំរូដែលបាន អនុវត្តកម្មវិធីសុខភាពសិក្សាគ្រប់ជ្រុងជ្រោយ នាព្រឹកថ្ងៃទី ៣ខែកុម្ភៈ ឆ្នាំ ២០២១នេះថា ក្រសួងអប់រំ មានគោលដៅបង្កើតឱ្យមានសាលារៀនគំរូយ៉ាងហោចមួយសម្រាប់គ្រប់ខេត្តទូទាំងប្រទេស ។
សម្រាប់ព្រឹកថ្ងៃនេះ ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ បានចូលរួមប្រកាសផ្សព្វផ្សាយសាលាបឋមសិក្សាចតុមុខ ជាសាលារៀនគំរូដែលបាន អនុវត្តកម្មវិធីសុខភាពសិក្សាគ្រប់ជ្រុងជ្រោយ។ ការក្លាយជាសាលាគំរូមុនដំបូងគេនេះ ព្រោះសាលាបឋមសិក្សាចតុមុខ បានអនុវត្តយ៉ាងល្អប្រសើរស្របតាម គោលនយោបាយជាតិស្ដីពីសុខភាពសិក្សា ដែលផ្តោតលើយុទ្ធសាស្ត្រសំខាន់ៗចំនួន៩។
ក្នុងឱកាសផ្សព្វផ្សាយជាផ្លូវការនេះ ឯកឧត្តម រដ្ឋមន្ត្រីក៏បានលើកឡើងជាគោលដៅចង់ឱ្យគ្រប់ខេត្តទាំងអស់ រៀបចំឱ្យមានសាលាគំរូមួយក្នុងការអនុវត្តកម្មវិធីសុខភាពសិក្សាគ្រប់ជ្រុងជ្រោយ ដើម្បីសាលាផ្សេងអនុវត្តតាម។ ក្នុងការអនុវត្តឱ្យបានជោគជ័យ ឯកឧត្តម មានប្រសាសន៍ថា កិច្ចការនេះទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់។
សម្រាប់ការក្លាយជា សាលាគំរូដែលអនុវត្តកម្មវិធីសុខភាពសិក្សាគ្រប់ជ្រុងជ្រោយនេះ លោក សូ ធី ជានាយករងក្ដាប់រួមផ្នែកបឋមសិក្សាលើកឡើងដែរថា សាលាបានបំពេញកិច្ចការជាច្រើនទើបសម្រេចបានកិច្ចការនេះ។ កិច្ចការទាំងនោះរួមមាន ការបង្កើតគណៈកម្មការសុខភាព សិក្សា ការបង្កើតបន្ទប់សុខភាព ការសហការជាមួយមណ្ឌលសុខភាពយ៉ាងជិតស្និទ្ធ ការធ្វើកិច្ចសន្យាជាមួយអ្នកលក់ដូរក្នុងសាលាត្រូវគោរពតាមការណែនាំរបស់ក្រសួងអប់រំ និងកិច្ចការជាច្រើនទៀត។
ការក្លាយជាសាលាគំរូនេះ ក៏ជាការផ្ដល់ទំនុកចិត្តភាពកក់ក្ដៅចំពោះអាណាព្យាបាលផងដែរ។ នេះជាការលើកឡើងរបស់ អាណាព្យាបាលមួយរូប ដែលបានចូលរួមក្នុងពិធីប្រកាសសាលាគំរូនាព្រឹកនេះ។
សម្រាប់ឆ្នាំសិក្សាឆ្នាំ ២០២០–២០២១នេះ ដោយសារវិបត្តិជំងឺកូវីដ ១៩ ទើបតែបានចាប់ផ្ដើមដំណើរការបានរយៈពេលជិត ១ខែប៉ុណ្ណោះ ស្របពេលដែលការសិក្សាបែបចម្រុះនៅតែបន្តអនុវត្ត និងទាមទារឱ្យគ្រប់គ្រឹះស្ថានសិក្សាត្រូវតែបន្តអនុវត្ត គោលការណ៍ប្រតិបត្តិ ស្តង់ដារ SOP ឱ្យបានខ្ជាប់ខ្ជួនដដែល។ គិតត្រឹមថ្ងៃទី ១ខែ កុម្ភៈ គឺមានសាលារៀនចំនួន ៤៤ ដែលមិនទាន់អាចបើកដំណើរការ ព្រោះសាលាទាំងនោះត្រូវប្រើប្រាស់ជាមណ្ឌលចត្តាឡីស័ក៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
