​បាល់ទាត់៖ ​ខ្សែប្រយុទ្ធ​ប្រេ​ស៊ី​ល Richarlison របស់ Everton នឹងត្រូវ​អវត្តមាន​យ៉ាងហោចណាស់ ១ខែ​ដោយសារ​របួស​កំភួនជើង​។​ កីឡាករ​វ័យ ២៤ឆ្នាំ​រូបនេះ​បានទទួល​រងរបួស​កំ​ភួ​ន​ជើង​អំឡុង​ការប្រកួត​ដែល Everton ចាញ់​នៅ​ទឹកដី Crystal Palace ៣-១ ដោយ​នៅពេលនោះ​ត្រូវបាន​ផ្លាស់ប្តូរ​ចេញ​នៅ​នាទី​ទី៥៨ ដែល​ការ​ផ្លាស់ប្តូរ​នោះ​អ្នកគាំទ្រ​មិន​យល់​នាំគ្នា​ស្រែក​សំលេង​ឌឺដង​លោក Rafael Benitez មុន​ពេលដែល​ត្រូវបាន​ឱ្យដឹងពី​បញ្ហា​របួស​នៅពេល​ធ្វើ​សន្និសីទកាសែត​ក្រោយ​ចប់​ការប្រកួត​។

​ការប្រកួត​នោះដែរ​ក្រៅពី Richarlison, Everton ក៏មាន​បញ្ហា​របួស​បន្ថែ​ម​ទៀត​គឺ Andros Townsend និង​ប្រធាន​ក្រុម Seamus Coleman​។ ​​កីឡាករ​ទាំង​ពីររូប​នេះ​នៅពេលនេះ​ស្ថិតក្នុង​បញ្ជី​កីឡាករ​របួស​របស់ Everton ហើយ​នឹង​រង់ចាំ​មើលថា ​ពួកគេ​នឹងត្រូវ​អវត្តមាន​រយៈពេល​ប៉ុន្មាន​។ ​សូមបញ្ជាក់ថា Everton មាន​បញ្ហា​កីឡាករ​របួស​ជាច្រើន​នាក់​រួចមកហើយ​រួមមាន​ខ្សែប្រយុទ្ធ​អង់គ្លេស Dominic Calvert-Lewin ដែល​អវត្តមាន​តាំងពី​ខែសីហា​ដោយសារ​របួស​ភ្លៅ, ខ្សែបម្រើ Tom Davies របួស​ជង្គង់, ខ្សែការពារ Yerry Mina របួស​កំភួនជើង​។ ​Everton បច្ចុប្បន្ន​ឈរ​លេខ ១៤ ក្នុង​តារាង​ក្របខណ្ឌ English Premier League៕

​អត្ថបទ​៖​នាង សុភា​វុ​ធ