ភ្នំពេញ ៖ នគរបាលនៅតាមថ្នាក់មូលដ្ឋានប៉ុស្តិ៍រដ្ឋបាល នៅតែបន្តយកចិត្តទុកដាក់ លើការខិតខំបំពេញការផ្តល់អត្តសញ្ញាណប័ណ្ណជូនបងប្អូនប្រជាពលរដ្ឋ ពិសេសអំពាវនាវពលរដ្ឋមានអត្តសញ្ញាណប័ណ្ណសុពលភាពក្រោម១៨០ថ្ងៃ សូមរុះរ៉ាន់អញ្ចើញធ្វើបច្ចុប្បន្នភាពបន្ត ។ 

អត្តសញ្ញាណប័ណ្ណសញ្ចាតិខ្មែរនេះ ក៏ជាឯកសារសំខាន់មួយ សម្រាប់បម្រើដល់ដំណើរការបោះឆ្នោតសម្រាប់ពលរដ្ឋគ្រប់រូបផងដែរ ពិសេសការធ្វើបច្ចុប្បន្នភាពបញ្ជីរឈ្មោះបោះឆ្នោតឆ្នាំ២០២៥នេះ ខណះនៅសល់តែ២ថ្ងៃទៀតប៉ុណ្ណោះ ដំណើរការធ្វើជីវមាត្របញ្ជីរឈ្មោះ នឹងត្រូវបិទបញ្ចប់ ។ 

លោកវរសេនីយ៍ត្រី សន ចំរើនបញ្ញា នាយប៉ុស្តិ៍រដ្ឋបាលនគរបាលផ្សារកណ្តាលទី១ ចំណុះអធិការដ្ឋាននគរបាលខណ្ឌដូនពេញ បានប្រាប់ឱ្យដឹងថា ៖ ដោយអនុវត្តតាមគោលការណ៍ណែនាំដ៏ខ្ពង់ខ្ពស់របស់លោកឧត្តមសេនីយ៍ឯកជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងក្រោមការចង្អុលបង្ហាញណែនាំដោយលោកវរសេនីយ៍ឯក ទៀង ច័ន្ទសារ អធិការនគរបាលដូនពេញ កម្លាំងនគរបាលប៉ុស្តិ៍តែងបានយកចិត្តទុកដាក់ជាប្រចាំ លើការផ្តល់សេវាអត្តសញ្ញាណប័ណ្ណសញ្ចាតិខ្មែរជូនពលរដ្ឋក្នុងមូលដ្ឋាន ទាំងពលរដ្ឋដែលគ្រប់អាយុ និងពលរដ្ឋដែលមានអត្តសញ្ញាណប័ណ្ណ ប៉ុន្តែផុតសុពលភាពជាដើម ។ 

ប្រជាពលរដ្ឋ សម្តែងក្តីរីករាយចំពោះការផ្តល់សេវា របស់នគរបាលក្នុងមូលដ្ឋាន ដែលការទទួលធ្វើអត្តសញ្ញាណប័ណ្ណ ឬឯកសារនានា មានភាពលឿនរហ័ស ងាយស្រួល មិនបង្កក្តីលំបាកនោះឡើយ ។ កាន់តែពិសេសនោះ គឺពេលទទួលបានអត្តសញ្ញាណបណ្ណ នគរបាលក៏បានយកចែកជូនពួកគាត់ ដល់តាមខ្នងផ្ទះផងដែរ ។ 

គួរបញ្ជាក់ថា ការផ្តល់សេវា លើការធ្វើអត្តសញ្ញាណប័ណ្ណ , សៀវស្នាក់នៅ និងសៀវភៅគ្រួសារនេះ គឺនគរបាលនៅតាមបណ្តាមូលដ្ឋានប៉ុស្តិ៍រដ្ឋបាលទាំង១០៥ ក្នុងរាជធានីភ្នំពេញ តែងយកចិត្តទុកដាក់ជានិច្ច ក្នុងការចុះធ្វើជាប្រចាំជូនប្រជាពលរដ្ឋ ដើម្បីអអាចឱ្យពលរដ្ឋទទួលយកទៅប្រើប្រាស់តាមសេវាតម្រូវការចាំបាច់ និងជាក់ស្តែងរៀងៗខ្លួន ៕  

អត្ថបទ ៖ លីហេង