ភ្នំពេញ៖ មជ្ឈមណ្ឌលសកម្មភាពកំចាត់មីនកម្ពុជា (CMAC) នឹងអនុវត្តគម្រោងបោសសំអាតមីន និងគ្រាប់យុទ្ធភណ្ឌមិនទាន់ផ្ទុះដោយសត្វកណ្ដុរ និងសុនខ នៅក្នុងខេត្តចំនួន៣ ដោយគ្រោងប្រើប្រាស់ថវិកាប្រមាណជាង ៣៥ម៉ឺនដុល្លារអាមេរិក ក្រោមការគាំទ្រថវិកាពីអង្គការ APOPO។
ក្នុងពិធីចុះហត្ថលេខាលើអនុស្សរណៈយោគយល់គ្នា រវាង CMAC និងអង្គការ APOPO ស្តីពីប្រតិបត្តិការបោសសំអាតមីន ដោយសត្វកណ្ដុរ និងសុនខ នៅថ្ងៃទី១៦ ខែធ្នូ ឆ្នាំ២០២១ លោក ម៉ៃឃើល ហែលមិន (Michael Heiman) ប្រធានគម្រោងរបស់អង្គការ APOPO ប្រចាំតំបន់អាស៊ាន លើកឡើងថា គម្រោងនេះនឹងអនុវត្តនៅខេត្តសៀមរាប ខេត្តព្រះវិហារ ដោយខេត្តទាំងពីរ នឹងធ្វើការងារបោសសំអាតមីន និងគ្រាប់យុទ្ធភណ្ឌមិនទាន់ផ្ទុះ ខណៈខេត្តកំពង់ឆ្នាំង អនុវត្តលើការបង្រៀនសត្វសុនខដោះមីន។
លោកបន្តថា គម្រោងនេះ នឹងចាប់ផ្ដើមអនុវត្តចាប់ពីថ្ងៃទី១ ខែមករា ឆ្នាំ២០២២ ដល់ថ្ងៃទី៣១ ខែធ្នូ ឆ្នាំ២០២២ (រយៈពេលមួយឆ្នាំ) ហើយវានឹងបានចូលរួមជាមួយ រាជរដ្ឋាភិបាលកម្ពុជា សម្រេចឲ្យបាននូវផែនការឆ្នាំ២០២៥ កម្ពុជាគ្មានមីន។
ក្នុងឱកាសនោះ ឯកឧត្តម ហេង រតនា អគ្គនាយកស៊ីម៉ាក់ បានថ្លែងអំណរគុណចំពោះអង្គការ APOPO ដែលបានចូលរួមគាំទ្រ ក្នុងការបោសសំអាតមីននៅកម្ពុជា ខណៈកងកម្លាំងស៊ីម៉ាក់ កំពុងមមាញឹកយ៉ាងខ្លាំង ក្នុងការបោសសំអាតគ្រាប់មីន នៅតាមតំបន់នានា ដែលកំពុងប្រឈមនឹងបញ្ហា នៃកាកសំណល់ពីសម័យសង្គ្រាម។
គួរបញ្ជាក់ថា រយៈពេល១១ខែ (មករា-វិច្ឆិកា) ឆ្នាំ២០២១ កងកម្លាំងរបស់ស៊ីម៉ាក់ បានធ្វើ ប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាម រំដោះផ្ទៃដីចម្ការមីន និងចម្ការគ្រាប់សរុបទំហំ ៩១ ៩១៩ ៩៧២ម៉ែត្រក្រឡា ស្មើនឹងជាង ៩២ភាគរយ នៃផែនការ ដោយរុករកឃើញនិងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទចំនួន ៨២ ១៣៨គ្រាប់ ។ បានចុះពិនិត្យទីតាំងគ្រាប់មីន និងយុទ្ធភណ្ឌមិនទាន់ផ្ទុះពលរដ្ឋរាយការណ៍ និងបានកម្ទេចចោលគ្រាប់មីននិងយុទ្ធភណ្ឌមិនទាន់ផ្ទុះគ្រប់ប្រភេទបានចំនួនជិត ១៥ ៤០០គ្រាប់ និងអាវុធធុនស្រាលមួយចំនួនផងដែរ ៕ អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
