ភ្នំពេញ៖ គណៈរដ្ឋមន្ត្រី បានស្នើការអនុម័តពីស្ថាប័ននីតិប្បញ្ញត្តិលើសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដើម្បីជំរុញពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូង និងដើម្បីដាក់ចូលជាធរមាននៅដើមឆ្នាំក្រោយ។
កិច្ចប្រជុំពេញគណៈរដ្ឋមន្ត្រី ត្រូវបានធ្វើឡើងក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបន្តចាប់ផ្តើមពិភាក្សាលើរបៀបវារៈស្តីពី “កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នៅថ្ងៃទី១៦ ខែធ្នូ។
កិច្ចព្រមព្រៀង ពាណិជ្ជកម្មសេរីកម្ពុជា-កូរ៉េ នឹងពង្រីកបន្ថែមទៀតលើការធ្ចើសេរីភាវូបនីយកម្មទីផ្សាររវាងប្រទេសទាំងពីរ លើសពីក្របខ័ណ្ឌអង្គការពាណិជ្ជកម្មពិភពលោក (WTO) សម្រាប់ប្រទេសអភិវឌ្ឍន៍តិចតួច (LDCs) និងលើសពីក្របខ័ណ្ឌកិច្ចព្រមព្រៀងពាណិជ្ជកម្មសេរីដែលមានស្រាប់ រួមមាន កិច្ចព្រមព្រៀងពាណិជ្ជកម្មសេរីអាស៊ាន-កូរ៉េ (AKFTA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។
កិច្ចព្រមព្រៀងនេះ បានធ្វើឲ្យប្រសើរឡើងនូវបដិប្បញ្ញត្តិពាក់ព័ន្ធវិធានដើមកំណើត និងកិច្ចសម្រួលពាណិជ្ជកម្មតាមរយៈការលើកម្ពស់តម្លាភាព និងធ្វើសាមញ្ញកម្មលើវិធានដើមកំណើត និងនីតិវិធីប្រតិបត្ដិនៃវិញ្ញាបនបត្រដើមកំណើត ក៏ដូចជាកាត់បន្ថយនីតិវិធី និងបែបបទរដ្ឋបាលដែលមិនចាំបាច់ សម្រាប់សម្រួលដល់ពាណិជ្ជករ ជាពិសេសសហគ្រាសខ្នាតតូច និងមធ្យម សំដៅលើកកម្ពស់លទ្ធភាពនាំចេញរបស់កម្ពុជាទៅកាន់សាធារណរដ្ឋកូរ៉េ។
ជារួមកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ ដ៏មានសារៈសំខាន់នេះ នឹងក្លាយជាកម្លាំងចលករដ៏សំខាន់ ក្នុងការជំរុញលំហូរពាណិជ្ជកម្ម និងការវិនិយោគរវាងកម្ពុជា ដែលនឹងផ្ដល់ប្រយោជន៍ឲ្យគ្នាទៅវិញទៅមកសំដៅបង្កើតផលប្រយោជន៍សេដ្ឋកិច្ច ការអភិវឌ្ឍ សុខមាលភាពប្រជាជន និងធុរកិច្ចនៃប្រទេសទាំងពីឲ្យកាន់តែប្រសើរឡើងបន្ថែមទៀត ជាពិសេសនឹងជំរុញការស្ដារឡើងវិញបានឆាប់រហ័សនូវសេដ្ឋកិច្ចរបស់ប្រទេសទាំងពីរដែលរងការប៉ះពាល់ពីការរាតត្បាតជាសកលនៃជំងឺកូវីដ-១៩។
ជាមួយគ្នានេះផងដែរ កិច្ចព្រមព្រៀងនេះ ក៏នឹងចូលរួមបង្កើនភាពជាដៃគូយូរអង្វែង រឹងមាំ ពង្រឹងភាពជាដៃគូសេដ្ឋកិច្ច និងពង្រីកការធ្វើសេរីភាវូបនីយកម្មពាណិជ្ជកម្មទ្វេភាគី ឱ្យកាន់តែមានភាពទូលំទូលាយផងដែរ។
ដើម្បីអាចចូលជាធរមានបាន កិច្ចព្រមព្រៀងពាណិជ្ជកម្មសេរីទ្វេភាគីនេះត្រូវការរយៈពេល៦០ថ្ងៃ បន្ទាប់ពីភាគីទាំងពីរជូនដំណឹងទៅវិញទៅមកតាមផ្លូវការទូតអំពីការបញ្ចប់នីតិវិធីផ្ទៃក្នុងនៃការផ្តល់សច្ចាប័នរបស់ខ្លួន។
ក្នុងគោលបំណងឱ្យកិច្ចព្រមព្រៀងនេះចូលជាធរមានបាននៅដើមឆ្នាំ២០២២ ដូចការគ្រោងទុកភាគីទាំងពីរបានឯកភាពគ្នាបញ្ចប់នីតិវិធីផ្ទៃក្នុងរៀងៗខ្លួនឱ្យបានឆាប់រហ័សតាមដែលអាចធ្វើបាន ដើម្បីផ្តល់សច្ចាប័នលើកិច្ចព្រមព្រៀងនេះជាការប្រញាប់៕ អត្ថបទ៖ វណ្ណៈ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
