អគ្គលេខាធិការ ឯកឧត្តម Kao Kim Hourn (កៅ គឹមហ៊ួន) បានប្រាប់ឲ្យដឹងថា សមាគមប្រជាជាតិអាស៊ីអាគ្នេយ៍ (អាស៊ាន) នឹងផ្តោតលើវិបត្តិរបស់មីយ៉ាន់ម៉ា និងកិច្ចចរចាសមុទ្រចិនខាងត្បូង នៅឯកិច្ចប្រជុំកំពូលលើកទី៤៦ របស់ខ្លួន ខណៈការត្រៀមរៀបចំកំពុងដំណើរការនៅទីក្រុងគូឡាឡាំពួរ ប្រទេសម៉ាឡេស៊ី កាលពីថ្ងៃសៅរ៍ (ទី២៤ ខែឧសភា)។

ឯកឧត្តម កៅ គឹមហ៊ួន បានបញ្ជាក់ថា អាស៊ានបាននិងកំពុងឆ្លើយតបទាំងលក្ខណៈសមូហភាព និងបុគ្គល ចំពោះការវិវត្ត នៅសហភាពមីយ៉ាន់ម៉ា ក្នុងនោះរួមទាំងការបំផ្លិចបំផ្លាញដោយសារគ្រោះរញ្ជួយដី នាពេលថ្មីៗនេះផងដែរ។

ហើយជាមួយគ្នានេះ ឯកឧត្តមក៏បានកត់សម្គាល់ផងដែរថា ខណៈពេលដែលភាពតានតឹងនៅតែបន្តកើតមាន នៅសមុទ្រចិនខាងត្បូង «ទាំងប្រទេសចិន និងអាស៊ាន បានប្តេជ្ញាចិត្តក្នុងការបញ្ចប់ដំណើរការចរចា នៅឆ្នាំក្រោយ»។ លើសពីនេះទៀត ឯកឧត្តមអគ្គលេខាធិការ បានប្រាប់សារព័ត៌មាន Reuters ថា ប្លុកកំពុងរៀបចំផែនការរយៈពេលវែង សម្រាប់តំបន់។

ឯកឧត្តម កៅ គឹមហ៊ួន បានសង្កត់ធ្ងន់ថា៖ «អាស៊ានមិនមានប្រតិកម្មទេ ប៉ុន្តែមានចក្ខុវិស័យខ្លាំងក្លា តាមរយៈចក្ខុវិស័យរយៈពេលវែងនេះ។ នេះផ្តល់ឲ្យយើងនូវផែនទីបង្ហាញផ្លូវ ដើម្បីដឹកនាំការកសាងសហគមន៍អាស៊ាន ដើម្បីណែនាំផ្លូវដែលយើងនឹងបន្តពន្លឿនការធ្វើសមាហរណកម្មក្នុងតំបន់ និងដើម្បីចូលរួមជាមួយដៃគូខាងក្រៅរបស់យើង»។

ចំណែកប្រធានអាស៊ាន បានលើកឡើងថា កិច្ចប្រជុំកំពូលរយៈពេល ២ថ្ងៃ នៅរដ្ឋធានីនៃប្រទេសម៉ាឡេស៊ីដែលដំណើរការពីថ្ងៃទី២៦ ខែឧសភា ដល់ថ្ងៃទី២៧ ខែឧសភា ក៏ជាការបង្ហាញផងដែរនូវចក្ខុវិស័យសហគមន៍អាស៊ានឆ្នាំ២០៤៥ និងផែនការយុទ្ធសាស្រ្តថ្មីចំនួន ៤ ដែលត្រូវបានរៀបចំឡើងក្នុងគោលបំណងជំរុញសមាហរណកម្ម និងកិច្ចសហប្រតិបត្តិការក្នុងតំបន់៕