ក្រុមមន្ត្រីបានប្រាប់ឲ្យដឹងថា កងកម្លាំងរុស្ស៊ី បានវាយប្រហារទីក្រុងគីវ និងទីក្រុងផ្សេងទៀត នាព្រឹកថ្ងៃអាទិត្យ (ទី២៥ ខែឧសភា) នេះ ដោយបានបណ្ដាលឲ្យមនុស្សយ៉ាងតិច ១១នាក់រងរបួស នៅក្នុងរដ្ឋធានី ហើយ ៣នាក់ផ្សេងទៀតស្លាប់ នៅក្នុងទីក្រុងជុំវិញនោះ ខណៈលំនៅឋាន និងអគារផ្សេងៗទៀតរងការខូចខាតយ៉ាងដំណំ។

ក្រុមមន្ត្រីនៅក្នុងតំបន់ទីក្រុងគីវ បានប្រាប់ថា មនុស្ស ៣នាក់ បានបាត់បង់ជីវិត នៅក្នុងទីក្រុងតូចៗចំនួន ២ នៅខាងក្រៅរដ្ឋធានី។ ការវាយប្រហារបានពង្រីកដល់មជ្ឈមណ្ឌល ក្នុងតំបន់មួយចំនួន ក្នុងនោះរួមមានទាំងទីក្រុងធំទី២ របស់អ៊ុយក្រែន គឺ Kharkiv ព្រមទាំងទីក្រុង Mykolaiv នៅភាគខាងត្បូង និង Ternopil នៅភាគខាងលិច។

គួរបញ្ជាក់ថា នេះគឺជាយប់ទី២ ជាប់គ្នា ដែលការវាយប្រហារទ្រង់ទ្រាយធំ បានកើតឡើង។ កាលពីល្ងាចថ្ងៃទី២៤ ខែឧសភា រុស្ស៊ីបានបាញ់បង្ហោះយានដ្រូន និងមីស៊ីលបាលីស្ទិករាប់សិបគ្រឿងទៅលើទីក្រុងគីវ ពេញមួយយប់ ជាការវាយប្រហារតាមអាកាសរួមគ្នាដ៏ធំបំផុតមួយលើរដ្ឋធានីអ៊ុយក្រែន នៅក្នុងសង្គ្រាមរយៈពេល ៣ឆ្នាំ។ អគារផ្ទះល្វែងមួយចំនួន បានរងការខូចខាត ហើយមនុស្ស ១៥នាក់ បានរងរបួស អំឡុងការវាយប្រហារនោះ។

ចំណែកក្រសួងការពារជាតិរុស្ស៊ី បានរាយការណ៍ថា អង្គភាពការពារដែនអាកាសរបស់ខ្លួន បានស្ទាក់ចាប់ ឬបំផ្លាញយានដ្រូនរបស់អ៊ុយក្រែនចំនួន ៩៥គ្រឿង ក្នុងរយៈពេល ៤ម៉ោង។ ហើយអភិបាលក្រុងមូស្គូលោក Sergei Sobyanin បាននិយាយថា យានដ្រូនរបស់អ៊ុយក្រែនចំនួន ១២គ្រឿងត្រូវបានស្ទាក់ចាប់ នៅពេលហោះសំដៅទៅកាន់រដ្ឋធានីនេះ៕