រដ្ឋមន្ត្រីការបរទេសអាស៊ាន បានប្ដេជ្ញាបន្តគាំទ្រដល់សហភាពមីយ៉ាន់ម៉ា និងបានជំរុញឲ្យមានការប្តេជ្ញាចិត្តចំពោះសាមគ្គីភាព ក្នុងតំបន់ ខណៈដែលប្លុកនេះជួបប្រទះនឹងបញ្ហាប្រឈមផ្នែកមនុស្សធម៌ និងនយោបាយដែលកំពុងបន្តមាន អំឡុងកិច្ចប្រជុំរដ្ឋមន្ត្រីការបរទេសអាស៊ាន នៅទីក្រុងគូឡាឡាំពួ ប្រទេសម៉ាឡេស៊ី នាថ្ងៃអាទិត្យ (ទី២៥ ខែឧសភា)។

រដ្ឋមន្ត្រីការបរទេសម៉ាឡេស៊ី លោក Mohamad Hasan បាននិយាយថា សកម្មភាពឆ្លើយតបដ៏លឿនរហ័សរបស់អាស៊ាន ចំពោះគ្រោះរញ្ជួយដី នៅសហភាពមីយ៉ាន់ម៉ា នាពេលថ្មីៗនេះ បានឆ្លុះបញ្ចាំងពីតម្លៃគ្រឹះនៃក្តីមេត្តា សាមគ្គីភាព និងមនុស្សជាតិ។

លោក Mohamad បានលើកឡើងនៅក្នុងសុន្ទរកថាបើករបស់លោកថា៖ «វាគឺជាសក្ខីភាពមួយ ចំពោះការប្តេជ្ញាចិត្តដែលមិនផ្លាស់ប្តូររបស់គ្រួសារអាស៊ាន ក្នុងការជួយដល់ប្រទេសមីយ៉ាន់ម៉ា ក្នុងគ្រាលំបាកនេះ»។ ហើយជាមួយគ្នានេះ លោកក៏បានអំពាវនាវដល់ភាគីពាក់ព័ន្ធមីយ៉ាន់ម៉ា ឲ្យពង្រីក និងបន្លាយរយៈពេលបទឈប់បាញ់បច្ចុប្បន្ន ដោយជំរុញឲ្យភាគីទាំងអស់ «ជួយសម្រាលដល់ទុក្ខវេទនារបស់ប្រជាជនមីយ៉ាន់ម៉ា» និងធ្វើការឆ្ពោះទៅរកសន្តិភាពយូរអង្វែង។

លោកបានបន្ថែមថា «យើងមានសំឡេងរបស់យើងនៅក្នុងកិច្ចការអន្តរជាតិ ហើយយើងត្រូវតែប្រើសំឡេងនោះ ដើម្បីនិយាយតំណាងឲ្យអ្នកដែលត្រូវបានជិះជាន់ និងផ្តល់ដំណោះស្រាយដោយផ្អែកលើគោលការណ៍ និងច្បាប់អន្តរជាតិ» ដោយលោកសង្កត់ធ្ងន់ថា អាស៊ានមិនត្រូវនៅស្ងៀមនៅពេលត្រូវប្រឈមនឹងវិបត្តិក្នុងតំបន់នោះឡើយ។

គួរបញ្ជាក់ថា ប្រទេសម៉ាឡេស៊ីបច្ចុប្បន្នធ្វើជាប្រធានប្ដូរវេននៃសមាគមប្រជាជាតិអាស៊ីអាគ្នេយ៍ដែលមានសមាជិក ១០ប្រទេស៕