ការធ្វើពាណិជ្ជកម្មកាន់តែងាយស្រួល ក្នុងចំណោមប្រទេសសមាជិកនៃសមាគមប្រជាជាតិអាស៊ីអាគ្នេយ៍ (អាស៊ាន) ក៏ដូចជាជាមួយដៃគូសេដ្ឋកិច្ចដ៏ធំបំផុតរបស់ប្លុក ក្នុងតំបន់ គឺប្រទេសចិន កំពុងស្ថិតនៅក្នុងរបៀបវារៈ ខណៈដែលក្រុមកំពុងជំរុញឆ្ពោះទៅមុខជាមួយនឹងវិធានការ «យ៉ាងខ្លាំងក្លា» ដើម្បីទប់ទល់នឹងការគំរាមកំហែងពីពន្ធគយរបស់សហរដ្ឋអាមេរិក។

នៅថ្ងៃអាទិត្យ (ទី២៥ ខែឧសភា) មុនកិច្ចប្រជុំកំពូលអាស៊ានលើកទី៤៦ រដ្ឋមន្ត្រីវិនិយោគ ពាណិជ្ជកម្ម និងឧស្សាហកម្មរបស់ម៉ាឡេស៊ី លោក Tengku Zafrul Abdul Aziz បានប្រាប់អ្នកសារព័ត៌មានថា អាស៊ានបានបញ្ចប់ការពិភាក្សា ស្ដីពីការធ្វើឲ្យប្រសើរឡើងកិច្ចព្រមព្រៀងពាណិជ្ជកម្មទំនិញអាស៊ាន (ATIGA) និងតំបន់ពាណិជ្ជកម្មសេរីចិន-អាស៊ាន (CAFTA) ដោយកិច្ចព្រមព្រៀងដែលត្រូវបានកម្ពស់នេះ នឹងចុះហត្ថលេខា នៅខែតុលា។

បន្ទាប់ពីធ្វើជាប្រធានកិច្ចប្រជុំក្រុមប្រឹក្សាសហគមន៍សេដ្ឋកិច្ចអាស៊ាន លោក Tengku Zafrul បាននិយាយថា៖ «យើងនៅតែមានទំនុកចិត្តថា ព្រឹត្តិការណ៍សំខាន់ៗទាំងនេះ នឹងដើរតួជាកត្តាផ្លាស់ប្ដូរដ៏សំខាន់ សម្រាប់កំណើនប្រកបដោយនិរន្តរភាព និងការប្រកួតប្រជែងរបស់អាស៊ាន»។

លោកបានបន្ថែមថា៖ «ការបញ្ចប់ដោយជោគជ័យនៃការចរចាទាំងនេះ ត្រូវបានរំពឹងថា នឹងពង្រឹងសមាហរណកម្មសេដ្ឋកិច្ចក្នុងតំបន់ និងបង្កើតអត្ថប្រយោជន៍សេដ្ឋកិច្ចយ៉ាងធំធេង សម្រាប់អាស៊ាន នៅពេលដែលយើងបន្តដោះស្រាយយ៉ាងប្រយ័ត្នប្រយែងជាមួយទិដ្ឋភាពសេដ្ឋកិច្ចពិភពលោកដែលកាន់តែប្រែប្រួលឥតឈប់ឈរនេះ»។

គួរបញ្ជាក់ថា ក្នុងនាមជាប្រធានប្ដូរវេន សម្រាប់អាស៊ាន នៅឆ្នាំនេះ ម៉ាឡេស៊ីបានជំរុញឲ្យប្លុកនេះធ្វើពិពិធកម្មដៃគូពាណិជ្ជកម្មរបស់ខ្លួន នៅចំពោះមុខអត្រាពន្ធដ៏ធ្ងន់ធ្ងរដែលដាក់ដោយប្រធានាធិបតីអាមេរិក លោក Donald Trump។ ហើយអំឡុងពេលថ្លែងនៅថ្ងៃអាទិត្យនេះ លោក Tengku Zafrul បានព្រមានប្លុកថា កុំបន្តស្ងៀមស្ងាត់ នៅក្នុងពេលដែលមានភាពមិនច្បាស់លាស់ខាងសេដ្ឋកិច្ចនេះ៕