ភ្នំពេញ៖ ស្ថានឯកអគ្គរាជទូតកម្ពុជា ប្រចាំសាធារណរដ្ឋកូរ៉េ​បានសហការជាមួយមន្ទីរពេទ្យ Soon Chun Hyang (SCH) និងមជ្ឈមណ្ឌលទ្រទ្រង់ជនបរទេសក្រុងគីមហេរ បានរៀបចំកម្មវិធី “ពិនិត្យសុខភាពដោយឥតគិតថ្លៃជូនបងប្អូនពលករ និងប្រជាពលរដ្ឋខែ្មរនៅកូរ៉េ” នៅមណ្ឌលសុខភាពគីមហេរ ។

ពិធីនេះធ្វើឡើង កាលពីថ្ងៃទី២៤ ខែឧសភា ឆ្នាំ២០២៥ ដោយមានការអញ្ជើញចូលរួមពីលោកជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋកូរ៉េ លោក HONG TAE YONG អភិបាលក្រុងគីមហេរ លោក PARK BYOUNGWON ប្រធានក្រុមគ្រូពេទ្យស្ម័គ្រចិត្តនៃមន្ទីរពេទ្យ SCH អ្នកស្រី KANG SUN HEE អនុប្រធានមជ្ឈមណ្ឌលទ្រទ្រង់ជនបរទេសក្រុងគីមហេរ មន្ត្រីស្ថានទូត ក្រុមគ្រូពេទ្យស្ម័គ្រចិត្ត ក្រុមយុវជនស្ម័គ្រចិត្ត និងអ្នកចូលរួមប្រមាណជាង ១៥០នាក់ ។

ក្នុងឱកាសនោះ លោកជំទាវឯកអគ្គរាជទូត បានសម្តែងការអរគុណចំពោះអាជ្ញាធរមូលដ្ឋាន ក្រុមគ្រូពេទ្រស្ម័គ្រចិត្តរបស់មន្ទីរពេទ្យ និងអ្នកពាក់ព័ន្ធ ដែលបានប្តេជ្ញាចិត្តយ៉ាងខ្លាំងចំពោះយុទ្ធនាការ ជំរុញការថែទាំសុខភាពសាធារណៈ ជាពិសេសសុខភាពរបស់ពលករបរទេស ឲ្យកាន់តែកៀកប្រជាពលរដ្ឋ ។ ស្របគ្នានេះ លោកជំទាវ បានអំពាវនាវឱ្យអាជ្ញាធរ ក៏ដូចជាមន្ទីរពេទ្យផ្សេងៗទៀត ចូលរួមយកចិត្តទុកដាក់គាំពារសុខុមាលភាពជូនប្រជាជន ជាពិសេសយកចិត្តទុកដាក់ ចំពោះសុខុមាលភាព របស់ប្រជាពលរដ្ឋខ្មែរដែលរស់នៅ និងធ្វើការនៅកូរ៉េនេះ ដែលជាកម្លាំងពលកម្មដ៏សំខាន់មួយ ក្នុងការចូលរួមជំរុញសង្វាក់ផលិតកម្ម និងបង្កើនសេដ្ឋកិច្ចសាធារណរដ្ឋកូរ៉េ ឲ្យកាន់តែរីកចំរើន ។

ជាងនេះទៅទៀត លោកជំទាវ ជ្រឹង បុទុមរង្សី បានពាំនាំសេចក្តីនឹករលឹកពីសំណាក់ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលតែងតែយកចិត្តទុកដាក់ចំពោះសុខទុក្ខរបស់បងប្អូនខ្មែររស់នៅសាធារណរដ្ឋកូរ៉េ ព្រមទាំងបានចែករំលែកពីការផ្តល់សេវាសាធារណៈរបស់ស្ថានឯកអគ្គរាជទូតផងដែរ ។

ជាចុងក្រោយ លោកជំទាវក៏បានលើកទឹកចិត្តឱ្យបងប្អូនពលរដ្ឋខ្មែរ ចូលរួមថែរក្សាសុខភាពទាំងផ្លូវកាយ និងផ្លូវចិត្តទាំងអស់គ្នា ដោយត្រូវពិនិត្យ និងពិគ្រោះយោបល់ជាមួយគ្រូពេទ្យជាប្រចាំផងដែរ ។

លោកអភិបាលក្រុងគីមហេរ និងលោកប្រធានក្រុមគ្រូពេទ្យស្ម័គ្រចិត្ត បានសម្តែងនូវសេចក្តីរីករាយ និងប្តេជ្ញាចិត្តបន្តកិច្ចសហការជាមួយស្ថានទូត ដើម្បីជំរុញសកម្មភាពនេះតទៅមុខទៀត។

ក្នុងកម្មវិធីនេះ ក្រុមការងារគ្រូពេទ្យ Soon Chun Hyang និងក្រុម HWPL បានពិនិត្យសុខភាពដូចជា ពិនិត្យបេះដូង ធ្វើតេស្តឈាម ពិនិត្យភ្នែក ត្រចៀក ច្រមុះ មាត់ បំពង់ក ពិនិត្យរោគស្ត្រី និងស្ត្រីមានផ្ទៃពោះ ពិគ្រោះយោបល់ខាងផ្នែកចិត្តសាស្រ្ត ព្រមទាំងបានផ្តល់ជូនថ្នាំ និងសម្ភារមួយចំនួនដែលទទួលបានពីសប្បុរសជននានា ជូនដល់អ្នកចូលរួមពិនិត្យប្រមាណជា ១០០នាក់ផងដែរ ។

សូមបញ្ជាក់ថា កម្មវិធីនេះ ជាកម្មវិធីដែលស្ថានឯកអគ្គរាជទូតបានរៀបចំជារៀងរាល់ឆ្នាំ ដោយបានសហការជាមួយក្រុមការងារគ្រូពេទ្យ Soon Chun Hyang ដើម្បីចុះត្រួតពិនិត្យសុខភាពជូនបងប្អូនប្រជាពលរដ្ឋខ្មែរ នៅតាមតំបន់នានា នៃសាធារណរដ្ឋកូរ៉េ ក្នុងគោលបំណងជម្រុញ ការពិនិត្យសុខភាពឱ្យកាន់តែខិតជិត នឹងប្រជាពលរដ្ឋ ។ ក្នុងឆ្នាំនេះដែរ ស្ថានឯកអគ្គរាជទូតគ្រោងនឹងរៀបចំ ២កន្លែងផ្សេងទៀតនៅសាធារណរដ្ឋកូរ៉េ ៕ អត្ថបទ បាន សុខរិទ្ធិ