នគរបាលបារាំងកំពុងស៊ើបអង្កេតលទ្ធភាពដែលអាចជាការវាយប្រហារដោយការដុត ពោលគឺជាអ្វីដែលត្រូវចាត់ទុកថា ទំនងជាដើមហេតុចម្បងនាំឲ្យមានការដាច់ចរន្តអគ្គិសនី នៅតំបន់ Alpes-Maritimes ភាគខាងត្បូងប្រទេសបារាំង កាលពីថ្ងៃសៅរ៍ (ទី២៤ ខែឧសភា) ក្នុងនោះរួមទាំងនៅទីក្រុង Cannes ដែលកំពុងរៀបចំមហោស្រពភាពយន្តអន្តរជាតិប្រចាំឆ្នាំដ៏ល្បីល្បាញផងដែរ។

អ្នកនាំពាក្យកងរាជអាវុធហត្ថជាតិបារាំង បានប្រាប់ឲ្យដឹងថា «យើងកំពុងពិនិត្យមើលលទ្ធភាពនៃអគ្គិភ័យដែលអាចត្រូវបានបង្កឡើងដោយចេតនា» ដោយបានបន្ថែមថា មិនទាន់មានការចាប់ខ្លួនណាមួយត្រូវបានធ្វើឡើងនៅឡើយទេ នាពេលនេះ។

ការិយាល័យនាយកដ្ឋានតំបន់ Alpes-Maritimes បានឲ្យដឹងថា អគ្គិភ័យមួយត្រូវបានឃើញកើតមាននៅឯស្ថានីយថាមពលតង់ស្យុងខ្ពស់ នៅតំបន់ Tanneron។ តំបន់ Tanneron ស្ថិតនៅចម្ងាយប្រហែល ២៣គីឡូម៉ែត្រ ភាគខាងលិចទីក្រុង Cannes។ បុគ្គលិកនៅហាងកាហ្វេ និងហាងនំប៉័ងមួយកន្លែង នៅតំបន់ Tanneron បាននិយាយថា ពួកគេមិនមានអគ្គិសនីប្រើប្រាស់ កាលពីព្រឹកថ្ងៃសៅរ៍ ដែលធ្វើឲ្យពួកគេមិនអាចបម្រើអតិថិជនបាន។

ថាមពលអគ្គិសនីបានដំណើរការឡើងវិញដោយផ្នែក នៅទីក្រុង Cannes នាពេលរសៀល ហើយ RTE (ប្រតិបត្តិករបណ្ដាញអគ្គិសនីបារាំង) បានឲ្យដឹងមុននោះថា ខ្លួនកំពុងធ្វើការ ដើម្បីស្តារចរន្តអគ្គិសនីឡើងវិញ នៅក្នុងតំបន់ដែលរងផលប៉ះពាល់ ក្នុងរយៈពេលប៉ុន្មានម៉ោងខាងមុខ។ រីឯអ្នករៀបចំមហោស្រពភាពយន្តទីក្រុងកាន (Cannes Film Festival) បានប្រាប់ថា ពិធីបិទនឹងប្រព្រឹត្តទៅតាមការគ្រោងទុក នាល្ងាចថ្ងៃសៅរ៍នោះ៕