កងទ័ពជើងទឹក នៅថ្ងៃអាទិត្យ (ទី២៥ ខែឧសភា) បានប្រាប់ឲ្យដឹងថា នាវាកុងតឺន័រមានទង់ជាតិប្រទេសលីបេរីយ៉ា ដែលផ្ទុកដោយទំនិញដ៏គ្រោះថ្នាក់ បានលិចនៅម្ដុំឆ្នេរ Kerala ភាគខាងត្បូងប្រទេសឥណ្ឌា ខណៈសមាជិកនាវិកទាំង ២៤នាក់ ត្រូវបានជួយសង្គ្រោះប្រកបដោយសុវត្ថិភាព។

កងទ័ពជើងទឹកឥណ្ឌា បានប្រាប់ថា នាវាដែលកំពុងផ្អៀងឈ្មោះ MSC ELSA 3 ជានាវាដឹកទំនិញប្រវែង ១៨៤ម៉ែត្រ ដែលកំពុងធ្វើដំណើរពីកំពង់ផែ Vizhinjam របស់ឥណ្ឌា ទៅកាន់ទីក្រុង Kochi បានជួបបញ្ហាកាលពីថ្ងៃសៅរ៍ ហើយបានប្រកាសសុំជំនួយបន្ទាន់។ យន្តហោះកងទ័ពជើងទឹក បានប្រញាប់ប្រញាល់ចេញណើរទៅកាន់តំបន់នោះ ហើយបានប្រទះឃើញទូកសង្គ្រោះជីវិតចំនួន២ និងនាវាកុងតឺន័រដែលកំពុងផ្អៀងរកកល់លិច នៅចម្ងាយប្រហែល ៣៨ម៉ាយល៍ណត់ (ប្រមាណ ៧០គីឡូម៉ែត្រ) នៅភាគនិរតីនៃទីក្រុង Kochi។

ក្រសួងការពារជាតិបានឲ្យដឹងនៅក្នុងសេចក្តីថ្លែងការណ៍ថា៖ «សមាជិកនាវិកទាំង ២៤រូប នៅលើនាវានោះ ត្រូវបានជួយសង្គ្រោះ»។ សេចក្តីថ្លែងការណ៍បានបន្ថែមថា៖ «នាវាបានលិចចុះដោយមានកុងតឺន័រចំនួន ៦៤០ទូ ក្នុងនោះរួមទាំង ១៣កុងទតឺន័រ មានទំនិញគ្រោះថ្នាក់ និង ១២កុងតឺន័រ ដែលមានផ្ទុកសារ Calcium Carbide ផងដែរ»។

យ៉ាងណាក្ដី ក្រសួងការពារជាតិមិនបានបញ្ជាក់ពីអ្វីដែលនៅខាងក្នុងកុងតឺន័រដែលខ្លួននិយាយថា មានគ្រោះថ្នាក់នោះទេ។ សារធាតុ Calcium Carbide ត្រូវបានគេប្រើក្នុងឧស្សាហកម្មគីមី ក្នុងនោះរួមមានទាំងការផលិតជី និងការផលិតដែកផងដែរ៕