ប្រមុខការពារជាតិអាល្លឺម៉ង់ លោក Carsten Breuer បានបញ្ជាឱ្យយោធាអាល្លឺម៉ង់ បំពាក់សព្វាវុធ និងគ្រឿងយុទ្ធោបករណ៍ផ្សេងៗទៀតដើម្បីពង្រីកសមត្ថភាពធ្វើសង្គ្រាមយ៉ាងឆាប់រហ័ស នៅឆ្នាំ២០២៩ នេះបើយោងតាមឯកសារមួយ មើលឃើញដោយសារព័ត៌មាន កាលពីថ្ងៃអាទិត្យ (២៥ ឧសភា)។ យោងតាមការប៉ាន់ប្រមាណរបស់លោក Breuer និងក្រុមមន្ត្រីយោធាជាន់ខ្ពស់ផ្សេងទៀតនៅអង្គការណាតូបានឱ្យដឹងថា នៅឆ្នាំ២០២៩ រុស្ស៊ីអាចនឹងបង្កើតកងកម្លាំងឡើងវិញគ្រប់គ្រាន់ដើម្បីវាយប្រហារទឹកដីណាតូ។

ឯកសារចុងក្រោយបង្អស់ដែលមានចំណងជើងថា "សេចក្ដីណែនាំអាទិភាពសម្រាប់ការពង្រឹងការត្រៀមខ្លួន" ដែលលោក Breuer បានចុះហត្ថលេខាកាលពីថ្ងៃទី១៩ ខែឧសភា បាននិយាយថា អាល្លឺម៉ង់ នឹងសម្រេចបាននូវគោលដៅនោះ ដោយមានជំនួយពីមូលនិធិដែលអាចរកបានពីការបន្ធូរបន្ថយបំណុលរបស់ប្រទេសក្នុងខែមីនា។

ក្នុងសេចក្តីណែនាំ លោក Breuer កំណត់អាទិភាពសម្រាប់សព្វាវុធដែលគួរទទួលបាន ឬអភិវឌ្ឍជាបន្ទាន់បំផុត ដោយឆ្លុះបញ្ចាំងពីផ្នែកអាទិភាពដែលអង្គការណាតូ បានដាក់ចេញពីមុន។ ក្នុងចំណោមនោះ Breuer បានរាយបញ្ជីការពង្រឹងប្រព័ន្ធការពារដែនអាកាសដ៏ទន់ខ្សោយរបស់អាល្លឺម៉ង់ ជាពិសេសសម្រាប់ការស្ទាក់ចាប់យានដ្រូន។

កាលពីឆ្នាំមុន ប្រភពព័ត៌មានបានប្រាប់រ៉យទ័រថា អង្គការណាតូ នឹងស្នើឱ្យទីក្រុងប៊ែរឡាំង បង្កើនយ៉ាងហោចណាស់ ៤ដងនៃការការពារដែនអាកាសរបស់ខ្លួន រាប់ចាប់ពីប្រព័ន្ធចម្ងាយឆ្ងាយ ដូចជាមីស៊ីល Patriot រហូតដល់ប្រព័ន្ធចម្ងាយខ្លីជាដើម។ បន្ថែមពីលើការជំរុញឱ្យស្តុកគ្រាប់របស់អាល្លឺម៉ង់ដែលត្រូវបំពេញបន្ថែម លោក Breuer ក៏បញ្ជាឱ្យទីក្រុងប៊ែរឡាំង បង្កើនគោលដៅស្តុកទុកសម្រាប់គ្រាប់រំសេវគ្រប់ប្រភេទផងដែរ៕