ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃចន្ទ (២៦ ឧសភា) នេះថា អាជ្ញាធរកូរ៉េខាងជើង បានឃុំខ្លួនមន្ត្រី ៤នាក់ ជុំវិញការបរាជ័យនៃការដាក់ដំណើរការនាវាពិឃាតកងទ័ពជើងទឹក នៅក្នុងឧប្បត្តិហេតុដ៏អាម៉ាស់មួយដែលមេដឹកនាំ លោក គីម ជុងអ៊ុន បាននិយាយថា បណ្តាលមកពីការធ្វេសប្រហែស និងថ្កោលទោសថាជា "ឧក្រិដ្ឋកម្ម"។

នាវាពិឃាតទម្ងន់ ៥.០០០តោននោះ បានខូចខាតកាលពីថ្ងៃពុធសប្ដាហ៍មុន នៅពេលលំយោលដឹកជញ្ជូននៅផ្នែកចុងខាងក្រោមនាវា ត្រូវផ្តាច់ចេញនៅព្រឹកព្រលឹមក្នុងពិធីដាក់ដំណើរការដែលចូលរួមដោយលោក គីម នៅកំពង់ផែ Chongjin ភាគឦសាន។ រូបភាពផ្កាយរណបនៅទីតាំងនោះ បានបង្ហាញថា នាវាផ្ដេកទៅចំហៀង ហើយគ្របដោយគម្របពណ៌ខៀវ ដោយផ្នែកខ្លះនៃនាវាបានលិចទឹក។

ការបរាជ័យនោះ ជារឿងដ៏អាម៉ាស់មួយសម្រាប់លោក គីម ដែលមានបំណងចង់កសាងកម្លាំងទ័ពជើងទឹកកាន់តែច្រើន ដើម្បីទប់ទល់ជាមួយនឹងអ្វីដែលលោកហៅថា ការគំរាមកំហែងផ្នែកយោធាដែលដឹកនាំដោយសហរដ្ឋអាមេរិក។ កូរ៉េខាងជើងបដិសេធថា នាវាម្បាំងមិនរងការខូចខាតធំដុំអ្វីទេ ដោយនិយាយថា ផ្ទៃខាងក្រោមមានស្នាមឆ្កូតបន្តិចប៉ុណ្ណោះ ហើយទឹកសមុទ្រខ្លះបានហូរចូលខាងក្នុង។

សារព័ត៌មាន KCNA បាននិយាយថា ក្នុងចំណោមមន្រ្តី ៤នាក់ដែលត្រូវចាប់ខ្លួននោះ រួមមានលោក Ri Hyong Son អនុប្រធានក្រសួងឧស្សាហកម្មអាវុធ នៅគណៈកម្មាធិការមជ្ឈិមបក្សកំពុងកាន់អំណាច ដែលបាននិយាយថា "ទទួលខុសត្រូវយ៉ាងខ្លាំង" ចំពោះការបរាជ័យដាក់ដំណើរការយានចម្បាំងនោះ៕