កងកម្លាំងការពារអ៊ីស្រាអែល (IDF) បាននិយាយកាលពីថ្ងៃអាទិត្យ (២៥ ឧសភា) ថា ខ្លួនមានបំណងវាយដណ្ដើមកាន់កាប់ ៧៥% នៃទឹកដីតំបន់ហ្កាហ្សាស្រ្ទីប ក្នុងរយៈពេលពីរខែ ដែលជាផ្នែកនៃការវាយលុកថ្មីរបស់ខ្លួន ប្រឆាំងនឹងក្រុមភេរវករហាម៉ាស។

អ៊ីស្រាអែល កាលពីថ្ងៃទី១៨ ខែមីនា បានបន្តប្រតិបត្តិការសឹករប្រឆាំងក្រុមហាម៉ាស ជាមួយនឹងរលកវាយប្រហារតាមអាកាស។ តាំងពីពេលនោះមក អ៊ីស្រាអែល បានដាក់ពង្រាយកងពល ៥អង្គភាពដែលមានទាហានរាប់ម៉ឺននាក់ ទៅកាន់ហ្កាហ្សា ហើយត្រៀមបើកការវាយលុកទ្រង់ទ្រាយធំមួយ បើក្រុមហាម៉ាស មិនព្រមដោះលែងចំណាប់ថ្នូរដែលខ្លួនកំពុងឃុំឃាំងទេនោះ។

បន្ទាប់ពីការជម្លៀសជនស៊ីវិលទៅកាន់តំបន់ជាក់លាក់មួយ យោធាអ៊ីស្រាអែល នឹងចាប់យកតំបន់ហ្កាហ្សាដែលនៅសេសសល់ បោសសម្អាតហេដ្ឋារចនាសម្ព័ន្ធរបស់ហាម៉ាស កម្ទេចអគារភាគច្រើន ហើយរក្សាទុកសម្រាប់ពេលខ្លី។ ទឹកដីដែលត្រូវដណ្ដើមយកនឹងរួមបញ្ចូលទាំងក្រុង Rafah, Khan Younis និងទីប្រជុំជននៅភាគខាងជើងនៃទីក្រុង Gaza។

យោងតាមផែនការរបស់យោធាអ៊ីស្រាអែល ដែលមើលឃើញដោយកាសែត The Times of Israel បង្ហាញថា យោធាអាចចំណាយពេលត្រឹមតែពីរខែដើម្បីចាប់យក ៧៥% នៃតំបន់ហ្កាហ្សា ចាប់ពីពេលដែលប្រតិបត្តិការនេះដំណើរការទៅមុខ ខណៈបច្ចុប្បន្ន យោធាកាន់កាប់ប្រហែល ៤០% រួចហើយនៃទឹកដីហ្កាហ្សាស្ទ្រីប។

ការិយាល័យប្រព័ន្ធផ្សព្វផ្សាយរដ្ឋាភិបាលហ្កាហ្សា ដែលគ្រប់គ្រងដោយក្រុមហាម៉ាស បាននិយាយកាលពីថ្ងៃអាទិត្យថា កងទ័ពអ៊ីស្រាអែល កំពុងគ្រប់គ្រងយ៉ាងមានប្រសិទ្ធភាពនូវទឹកដី ៧៧% នៃតំបន់ហ្កាហ្សា ក្នុងប្រតិបត្តិការយោធាកំពុងបន្ត ដែលបណ្តាលឱ្យមានការភៀសខ្លួនដ៏ធំនៅទូទាំងតំបន់នេះ៕