អឺរ៉ុប៖ មេដឹកនាំសហភាពអឺរ៉ុបបានព្រមព្រៀងគ្នាកាលពីថ្ងៃព្រហស្បតិ៍ ទី១៦ ខែធ្នូថា ពួកគេនឹងដាក់ទណ្ឌកម្មសេដ្ឋកិច្ចបន្ថែមទៀតលើប្រទេសរុស្ស៊ី ក្នុងពេលដំណាលគ្នាជាមួយសហរដ្ឋអាមេរិក និងចក្រភពអង់គ្លេស ប្រសិនបើយោធារុស្ស៊ីឈ្លានពានអ៊ុយក្រែន ទោះបីជាមេដឹកនាំទាំងនោះបានលើកទឹកចិត្ត ឱ្យមានទំនាក់ទំនងការទូតបន្ថែមទៀតជាមួយទីក្រុងម៉ូស្គូក៏ដោយ។
បណ្ដាប្រទេសនៅជុំវិញសមុទ្របាល់ទិក ភាគកណ្តាល និងភាគខាងកើតអឺរ៉ុបជឿថា ប្លុកខ្លួនឯងក៏ស្ថិតនៅក្រោមការវាយលុកពីរុស្ស៊ីលើផ្នែកជាច្រើនផងដែរ ដោយប្រទេសលីទុយអានីបានលើកឡើងពីហានិភ័យ នៃការវាយប្រហារដោយយោធារុស្ស៊ីដែលអាចកើតមានពីបេឡារុស ដែលជាសម្ព័ន្ធមិត្តជិតស្និទ្ធរបស់រុស្ស៊ី។ ក្រុមមេដឹកនាំបាននិយាយនៅក្នុងសេចក្តីថ្លែងការណ៍ នៃកិច្ចប្រជុំកំពូលចុងក្រោយរបស់ខ្លួន ដោយសំដៅទៅលើសម្ព័ន្ធមិត្តរបស់សហរដ្ឋអាមេរិក និងចក្រភពអង់គ្លេសថា រាល់ការឈ្លានពានយោធាបន្ថែមទៀតប្រឆាំងនឹងអ៊ុយក្រែននឹងមានផលវិបាកដ៏ធំ និងខូចខាតធ្ងន់ធ្ងរក្នុងការឆ្លើយតប រួមទាំងវិធានការរឹតបន្តឹងដែលសម្របសម្រួលជាមួយដៃគូ។ បណ្ដាប្រទេសលោកខាងលិចបានដាក់ទណ្ឌកម្មសេដ្ឋកិច្ចលើរុស្ស៊ីកាលពីឆ្នាំ២០១៤ ជុំវិញការបញ្ចូលឧបទ្វីបគ្រីមៀពីអ៊ុយក្រែនជាឧបសម្ព័ន្ធរបស់រុស្ស៊ីតាមរយៈការធ្វើប្រជាមតិ ជាមួយនឹងវិធានការដាក់គោលដៅលើវិស័យថាមពល ធនាគារ និងការពារជាតិរបស់រុស្ស៊ី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
