យោងតាមក្រុមមន្ត្រី និងអ្នកជំនាញកោះតៃវ៉ាន់ និងសហរដ្ឋអាមេរិក បានឱ្យដឹងថា ប្រទេសចិន បានបង្កើនសមត្ថភាពរបស់ខ្លួន ក្នុងការបើកការវាយក្រសោបភ្លាមៗទៅលើកោះតៃវ៉ាន់ ជាមួយនឹងប្រតិបត្តិការផ្លូវអាកាសកាន់តែលឿនជាងមុន ប្រព័ន្ធកាំភ្លើងធំថ្មី ការប្រុងប្រយ័ត្នថលជលិក (ទាំងផ្លូវគោក និងអាកាស) បន្ថែមទៀត ព្រមទាំងអង្គភាពប្រតិបត្តិការច្រកអាកាស។

មន្ត្រីយោធាជាន់ខ្ពស់កោះតៃវ៉ាន់ម្នាក់និយាយថា កងកម្លាំងទ័ពអាកាស និងមីស៊ីលរបស់ចិន ដែលនឹងដើរតួសំខាន់ក្នុងការក្រសោបយកតៃវ៉ាន់ បានប្រសើរឡើងដល់ចំណុចមួយដែលពួកគេអាច "ផ្លាស់ប្តូរពីពេលវេលាសន្តិភាព ទៅជាប្រតិបត្តិការសង្រ្គាមគ្រប់ពេលវេលាទាំងអស់"។

មន្ត្រីអាជ្ញាធរការពារជាតិតៃវ៉ាន់ផ្សេងទៀតនិយាយថា ប្រតិបត្តិការរបស់កងទ័ពរំដោះប្រជាជនចិន ឥឡូវនេះរួមបញ្ចូលការបណ្តុះបណ្តាលជាបន្តបន្ទាប់នៃកងកម្លាំងថលជលិក នៅជិតកំពង់ផែចាកចេញសម្រាប់ការក្រសោបកោះទាំងមូល ការត្រៀមខ្លួនជានិច្ចនៃអង្គភាពអាកាសចរកងទ័ព ដែលនឹងទម្លាក់យន្តហោះចូលទៅក្នុងកោះ និងប្រព័ន្ធរ៉ូកែតថ្មីដែលមានសមត្ថភាពវាយគ្រប់ទីកន្លែងនៅលើកោះនេះ។

ឧត្តមនាវីឯក Samuel Paparo ប្រមុខបញ្ជាការឥណ្ឌូប៉ាស៊ីហ្វិករបស់អាមេរិក កាលពីខែកុម្ភៈ បាននិយាយថា ចិនខិត "កាន់តែជិត" ដល់ចំណុចដែល "សមយុទ្ធបន្តបន្ទាប់" របស់ខ្លួនអាចបិទបាំងការត្រៀមលក្ខណៈសម្រាប់ប្រតិបត្តិការមួយ។

ក្រុមមន្ត្រីការពារជាតិអាមេរិក ក៏និយាយថា កងនាវាចរនៃកងទ័ពចិន និងឆ្មាំល្បាតឆ្នេរចិន បង្កើតវត្តមានឥតឈប់ឈរនៃនាវាប្រហែលរាប់សិបគ្រឿង ដែលត្រូវដាក់ពង្រាយជុំវិញតំបន់តៃវ៉ាន់។ មន្ត្រីកោះស្វ័យគ្រប់គ្រងនេះនិយាយថា វត្តមាននាវាចម្បាំងទាំងនោះមានន័យថា ចិនអាចបើកការវាយក្រសោបតាមផ្លូវអាកាសដោយមិនមានការព្រមានជាមុន៕