បាល់ទាត់៖ ព្រឹត្តិការណ៍បាល់ទាត់ AIA ISF Football Festival 2021 ដែលរៀបចំដោយអង្គការផ្កាយសមុទ្រក្រោមការឧបត្ថម្ភរបស់ក្រុមហ៊ុន អេ អាយ អេ ខេមបូឌា បានចាប់ផ្ដើមឡើងវិញហើយកាលពីថ្ងៃទី១៦ ខែធ្នូម្សិលមិញ បន្ទាប់ពីកម្មវិធីនេះបានខកខានរៀបចំតាំងពីដើមឆ្នាំ ដោយសារការរីករាលដាលនៃជំងឺកូវីដ-១៩។
កញ្ញា ជួប វិច្ឆិកា នាយិកាអង្គការផ្កាយសមុទ្របានសម្ដែងការសប្បាយចិត្តជាខ្លាំង ក្រោយរាជរដ្ឋាភិបាលបើកដំណើរការប្រទេសឡើងវិញ ធ្វើឲ្យអង្គការរបស់កញ្ញាបានរៀបចំនូវកម្មវិធីនេះឡើងវិញ ដើម្បីផ្ដល់ឱកាសឲ្យយុវជនបានសិក្សាក៏ដូចជាការលេងកីឡា ជាក់ស្ដែងការត្រឡប់មកវិញនៃព្រឹត្តិការណ៍ AIA ISF Football Festival 2021 គណៈកម្មការរៀបចំបានអនុញ្ញាតឲ្យយុវជនចំនួន ១០០នាក់ចូលរួម។ កញ្ញាបន្ដថា បច្ចុប្បន្នអង្គការកំពុងធ្វើការជាមួយកីឡាករ-កីឡាការិនីវ័យក្មេងៗជាង ៣,៥០០នាក់ទាំងនៅភ្នំពេញ និងណ្ដាខេត្តចំនួន ១២ ។ តាំងពីបង្កើតឡើងក្នុងឆ្នាំ២០១៦ មកដល់បច្ចុប្បន្ន អង្គការបណ្ដុះក្មេងៗឲ្យក្លាយជាកីឡាករអាជីព រហូតមានឱកាសលេងឲ្យក្លិបអាជីព និងជម្រើសជាតិជាច្រើនរូបទៀតផង។ កញ្ញាចាត់ទុកនេះគឺជាសមិទ្ធផលមួយ ក្នុងការរួមចំណែកជួយដល់វិស័យបាល់ទាត់នៅកម្ពុជា ពិសេសបណ្ដុះគំនិតដល់ក្មេងកំព្រា កុមារពិការ គថ្លង់ជាដើម ឲ្យបន្តប្រឹងប្រែងក្នុងជីវិតរបស់ពួកគេកុំឲ្យបោះបង់ចោលក្ដីស្រមៃ។
ទន្ទឹមជាមួយគ្នាកីឡាករ អាំ សុវណ្ណារ៉ាត់ អ្នកចាំទីមកពីក្លិបព្រះខ័នរាជស្វាយរៀង ក៏បានបង្ហាញការសប្បាយចិត្តដែលបានចូលរួមចែករំលែកបទពិសោធន៍ដល់ក្មេងៗ ពិសេស សុវណ្ណារ៉ាត់ បានកោតសរសើរយុវជនមួយចំនួន ទោះបីខ្វះខាតសម្ភារៈក៏ពួកគេនៅតែចូលរួមដោយក្ដីស្រលាញ់។ តាមរយៈនេះគេរំពឹងថា ព្រឹត្តិការណ៍នេះនឹងជំរុញឲ្យយុវជនកាន់តែខំប្រឹងជាមួយបាល់ទាត់ ដើម្បីឈានទៅសម្រេចក្ដីស្រមៃរបស់ខ្លួននាថ្ងៃអនាគត។ ដោយឡែកកញ្ញា ថោង បវរលក្ខិណា ប្រធានផ្នែកទីផ្សារក្រុមហ៊ុន អេ អាយ អេ ក្នុងនាមក្រុមហ៊ុន ដែលមានកិច្ចសហប្រតិបត្តិការជាមួយក្លិប Tottenham Hotspur FC បានសម្ដែងសេចក្ដីរីករាយចំពោះការរួមចំណែកគាំទ្រកម្មវិធីមួយនេះ ពិសេសការនាំយកនូវកីឡាករ និងគ្រូបច្ចេកទេសពីក្លិប Spurs ក្នុងការចែករំលែកបទពិសោធន៍ល្អៗ ក៏ដូចជាលើកទឹកចិត្តដល់យុវជនកម្ពុជា ដើម្បីឈានទៅសម្រេចក្ដីស្រម៉ៃចង់ក្លាយជាកីឡាករអាជីពតាមរយៈព្រឹត្តិការណ៍ AIA ISF Football Festival នេះផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
