ក្រសួងធនធានទឹក និងឧតុនិយមរបស់ប្រទេសថៃ បានចេញសេចក្តីជូនដំណឹងស្តីពីស្ថានភាពអាកាសធាតុ ចាប់ពីថ្ងៃទី២៥-២៧ ខែឧសភា ដោយអំពាវនាវឱ្យប្រជាពលរដ្ឋទូទាំងប្រទេស រក្សាការប្រុងប្រយ័ត្នចំពោះភ្លៀងធ្លាក់ដ៏ខ្លាំងក្លា ទឹកជំនន់យ៉ាងគំហុគ និងជំនន់ពីទឹកភ្លៀង ជាពិសេសនៅតំបន់ទំនាបកណ្តាល និងវាលទំនាបក្បែរផ្លូវទឹក។

ការព្រមានដែលចេញកាលពីថ្ងៃអាទិត្យ (២៥ ឧសភា) នេះ បានកើតឡើងដោយសាររដូវកាលខ្យល់មូសុងនិរតីដែលមានកម្លាំងខ្លាំង បានបោកបក់កាត់សមុទ្រ Andaman និងឈូងសមុទ្រថៃ រួមផ្សំដោយការព្យាករខ្យល់មូសុងដ៏មានឥទ្ធិពល នឹងឆ្លងកាត់ប្រទេសថៃ ផ្នែកខាងលើ និងតំបន់ភាគខាងត្បូងក្នុងអំឡុងពេលនេះ។

អាជ្ញាធរណែនាំឱ្យប្រជាពលរដ្ឋចៀសវាងការធ្វើដំណើរឆ្លងកាត់តំបន់ដែលមានភ្លៀងផ្គរ ឬត្រូវគេស្គាល់ជាតំបន់លិចទឹក ដោយត្រូវតែរក្សាប្រុងប្រយ័ត្នឱ្យបានខ្ពស់បំផុតនៅពេលបើកបរ និងនៅឱ្យឆ្ងាយពីតំបន់ងាយនឹងមានបំណាក់ដី ជាពិសេសនៅជិតភ្នំ និងច្រាំងទន្លេ។

ទោះបីស្ថានភាពត្រូវបានរំពឹងថានឹងមានភាពប្រសើរឡើងចាប់ពីថ្ងៃទី២៨ ដល់ថ្ងៃទី៣១ ខែឧសភា ខាងមុខនេះក៏ដោយ ក៏ប៉ុន្តែការគំរាមកំហែងនៃទឹកជំនន់នៅតែបន្តកើតមាន នៅតំបន់ដែលបន្តទទួលភ្លៀងធ្លាក់ខ្លាំង ជាពិសេសនៅភាគខាងជើង និងឦសាន៕