ប្រធានាធិបតីហ្វីលីពីន លោក Ferdinand Marcos Jr. នៅថ្ងៃចន្ទ (២៦ ឧសភា) នេះ បានលើកឡើងពីតម្រូវការពន្លឿននូវការអនុម័តក្រមប្រតិបត្តិដែលមានចំណងផ្លូវច្បាប់ដើម្បីទប់ស្កាត់ម្លោះដ៏ធំណាមួយនៅក្នុងសមុទ្រចិនខាងត្បូងដ៏ប្រកួតប្រជែង។

លោក Marcos បានធ្វើការអំពាវនាវជាថ្មីនេះនៅអំឡុងពេលសម័យប្រជុំពេញអង្គនៃកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន លើកទី៤៦ នៅប្រទេសម៉ាឡេស៊ី ជាទីដែលលោកបានចូលរួមជាមួយបណ្ដាប្រមុខរដ្ឋផ្សេងទៀតក្នុងការដោះស្រាយបញ្ហាកង្វល់ទៅវិញទៅមកចំពោះប្លុកក្នុងតំបន់។

លោក Marcos បានលើកឡើងថា "ហ្វីលីពីនគូសបញ្ជាក់ពីតម្រូវការបន្ទាន់ដើម្បីពន្លឿនការអនុម័តក្រមប្រតិបត្តិមានចំណងផ្លូវច្បាប់នៅសមុទ្រចិនខាងត្បូង ដើម្បីការពារសិទ្ធិដែនសមុទ្រ លើកកម្ពស់ស្ថិរភាព និងទប់ស្កាត់ការគណនាខុសនៅដែនសមុទ្រ”។

នៅមុនជំនួបកំពូលនេះ ក្រសួងការបរទេសទីក្រុងម៉ានីល បាននិយាយថា លោក Marcos នឹងជំរុញឱ្យមានការសម្រេចក្រមប្រតិបត្តិសមុទ្រចិនខាងត្បូង ដើម្បីទប់ស្កាត់ជម្លោះដ៏ធំណាមួយនៅក្នុងផ្លូវទឹកយុទ្ធសាស្រ្តនេះ។ ហ្វីលីពីន កំពុងសម្លឹងមើលការសម្រេចបាននូវក្រមនោះនៅឆ្នាំ២០២៦ នៅពេលដែលខ្លួនធ្វើជាម្ចាស់ផ្ទះនៃកិច្ចប្រជុំកំពូលអាស៊ាន នៅទីក្រុងម៉ានីល៕