យោងទៅតាមអាជ្ញាធររៀបចំការបោះឆ្នោត បានឲ្យដឹងថា គណបក្សសង្គមនិយមដែលកំពុងកាន់អំណាចរបស់ប្រទេសវេណេហ្ស៊ុយអេឡា បានគ្រប់គ្រងសំឡេងភាគច្រើនដ៏សំខាន់របស់ខ្លួន នៅក្នុងរដ្ឋសភា អំឡុងការបោះឆ្នោត កាលពីថ្ងៃអាទិត្យ (ទី២៥ ខែឧសភា) ដោយទទួលបានសំឡេងជិត ៨៣ភាគរយ ជាការប្រកួតប្រជែងមួយដែលមេដឹកនាំបក្សប្រឆាំងមួយចំនួនបានធ្វើពហិការ ចំពេលមានការបែកបាក់យ៉ាងខ្លាំងក្លា ក្នុងចំណោមគណបក្សដែលប្រឆាំងនឹងរដ្ឋាភិបាលរបស់លោកប្រធានាធិបតី Nicolas Maduro។

មេដឹកនាំបក្សប្រឆាំងធំៗមួយចំនួនរបស់ប្រទេសនេះ បានអំពាវនាវឲ្យអ្នកបោះឆ្នោតធ្វើពហិការ ជាការតវ៉ានឹងលទ្ធផលផ្លូវការនៃការបោះឆ្នោតប្រធានាធិបតីខែកក្កដាឆ្នាំ២០២៤ ដែលបក្សប្រឆាំងលើកឡើងថា ខ្លួនមានជ័យជម្នះ តែអាជ្ញាធរ ប្រាប់ថា ជ័យជម្នះជារបស់លោក Maduro។

លទ្ធផល កាលពីថ្ងៃអាទិត្យ នឹងបន្តធ្វើគណបក្សកាន់អំណាចគ្រប់គ្រងការិយាល័យអគ្គរដ្ឋអាជ្ញា និងតុលាការកំពូល ដែលសមាជិករបស់ស្ថាប័នទាំង២ ត្រូវបានជ្រើសរើសដោយសមាជិកសភា។ អាជ្ញាធរមិនបានផ្តល់ចំនួនអាសនៈសរុបដែលនឹងត្រូវកាន់កាប់ដោយគណបក្សនីមួយៗនោះទេ ប៉ុន្តែបានដាក់ឈ្មោះតំណាងរាស្រ្តចំនួន ៤០នាក់មកពីគណបក្សផ្សេងៗដែលទទួលបានអាសនៈ។

នៅក្នុងសេចក្តីប្រកាសដែលត្រូវបានចាក់ផ្សាយតាមទូរទស្សន៍រដ្ឋ ប្រមុខក្រុមប្រឹក្សាជាតិរៀបចំការបោះឆ្នោត (CNE) លោក Carlos Quintero បានឲ្យដឹងថា សម្ព័ន្ធដែលត្រូវបានចាត់ទុកថា ស្និទ្ធនឹងគណបក្សសង្គមនិយម បានទទួលបាន ៦,២៥ភាគរយនៃសន្លឹកឆ្នោត ខណៈដែលសម្ព័ន្ធភាពប្រឆាំងមួយទទួលបាន ៥,១៧ភាគរយ។ លោក Quintero បាននិយាយថា ការបោះឆ្នោតជ្រើសរើសអភិបាលរដ្ឋចំនួន ២៤ និងសមាជិកសភា ២៨៥នាក់ គឺចំនួន ៤២,៦ភាគរយនៃអ្នកបោះឆ្នោតដែលមានសិទ្ធិបោះឆ្នោតចំនួន ២១ លាននាក់ ដែលស្រដៀងទៅនឹងចំនួនអ្នកទៅបោះឆ្នោតនៅឆ្នាំ២០២១៕