រដ្ឋមន្ត្រីការបរទេសអាល្លឺម៉ង់ លោក Johann Wadephul កាលពីថ្ងៃអាទិត្យ (ទី២៥ ខែឧសភា) បានប្រាប់ទូរទស្សន៍ ARD ថា ការវាយប្រហារចុងក្រោយរបស់រុស្ស៊ីលើអ៊ុយក្រែន គួរតែត្រូវបានឆ្លើយតបដោយការដាក់ទណ្ឌកម្មរបស់លោកខាងលិចបន្ថែមទៀត។

អំឡុងបទសម្ភាសផ្សាយផ្ទាល់ ក្នុងកម្មវិធី Bericht aus Berlin របស់ប្រព័ន្ធផ្សព្វផ្សាយ ARD លោកបានប្រាប់ថា៖ «ប្រធានាធិបតីរុស្ស៊ី លោក Vladimir Putin មិនចាប់អារម្មណ៍នឹងសន្តិភាពទេ លោកចង់បន្តសង្រ្គាមនេះ ហើយយើងមិនត្រូវបណ្ដោយឲ្យរឿងនេះកើតឡើងឡើយ ជាហេតុផលដែលសហភាពអឺរ៉ុបនឹងយល់ព្រមលើការដាក់ទណ្ឌកម្មបន្ថែមទៀត»។

គួរបញ្ជាក់ថា ក្រុមមន្ត្រីបានលើកឡើងថា កងកម្លាំងរុស្ស៊ីបានបាញ់បង្ហោះយានដ្រូន និងមីស៊ីលចំនួន ៣៦៧ សំដៅទៅទីក្រុងនានារបស់អ៊ុយក្រែនពេញមួយយប់ ក្នុងនោះរួមទាំងរដ្ឋធានីគីវផងដែរ ជាការវាយប្រហារតាមអាកាសដ៏ធំបំផុតនៃសង្គ្រាម ដែលបន្តមានរហូតមកទល់ពេលនេះ ដោយបានបណ្ដាលឲ្យមនុស្សយ៉ាងហោចណាស់ ១២នាក់ស្លាប់ និងរាប់សិបនាក់ទៀតរងរបួស។

ជាមួយគ្នានេះ លោក Wadephul បានបន្ថែមថា សហរដ្ឋអាមេរិកក៏អាចដាក់ចេញកញ្ចប់ទណ្ឌកម្មថ្មីផងដែរ ហើយលោកសង្ឃឹមថា ទម្ងន់នៃវិធានការនេះ នឹងនាំលោក Putin ទៅកាន់តុចរចា ដើម្បីបញ្ចៀសនូវអ្វីដែលលោកហៅថា ជាលទ្ធភាពផ្ដល់ផលវិបាកដ៏ធ្ងន់ធ្ងរដល់វិស័យសេដ្ឋកិច្ច និងថាមពលរបស់រុស្ស៊ី។

ងាកទៅកាន់ការវាយលុកយោធារបស់អ៊ីស្រាអែល នៅតំបន់ហ្កាហ្សាឯណោះវិញ លោក Wadephul បានបញ្ជាក់ថា ប្រទេសអាល្លឺម៉ង់មានក្ដីបារម្ភយ៉ាងខ្លាំង ចំពោះទុក្ខវេទនារបស់ប្រជាជន «ដែលពិបាកទ្រាំទ្របាន» ជាកន្លែងដែលលោកបានប្រាប់ថា លោកកំពុងទាក់ទងជាមួយសម្ព័ន្ធមិត្តអ៊ីស្រាអែល មជ្ឈិមបូព៌ា និងអឺរ៉ុប ដើម្បីប្រឹងប្រែងសម្រុះសម្រួលរកដំណោះស្រាយ៕