ក្រុមអាជ្ញាធរក្នុងស្រុកនិយាយប្រាប់ទីភ្នាក់ងារព័ត៌មានរ៉យទ័រនៅថ្ងៃចន្ទនេះថា ការវាយប្រហាររបស់អ៊ីស្រាអែលលើសាលារៀនមួយកន្លែងជាទីជម្រកសម្រាប់មនុស្សជម្លៀសខ្លួននៅតំបន់ហ្កាហ្សាស្រ្ទីប បានសម្លាប់មនុស្សយ៉ាងហោច ៣៦នាក់ ហើយមនុស្សរាប់សិបនាក់ផ្សេងទៀត រងរបួស ។

ក្រុមគ្រូពេទ្យបឋមនិយាយថា មនុស្សរាប់សិបនាក់ បានរងគ្រោះនៅក្នុងការវាយប្រហារលើសាលារៀនមួយកន្លែង ស្ថិតក្នុងសង្កាត់ Daraj ទីក្រុងហ្កាហ្សា រួមទាំងស្រ្តី និងកុមារផងដែរ ។

យោងតាមរូបថតសន្លឹកដែលបានបង្ហោះនៅលើបណ្តាញព័ត៌មានសង្គមឃើញសាកសពមនុស្សមួយចំនួនរងការឆាបឆេះរឡេះរលួយយ៉ាងធ្ងន់ធ្ងរ ។

សាកសពមនុស្សដែលរួមមានទាំងកុមារ ៩នាក់ ត្រូវបាននាំយកទៅកាន់មន្ទីរពេទ្យ ។ នៅមិនទាន់មានការធ្វើសេចក្តីអត្ថាធិប្បាយភ្លាមៗនោះទេពីយោធាអ៊ីស្រាអែល ។

បើទោះបីជាមានសម្ពាធអន្តរជាតិកើនឡើងឲ្យអ៊ីស្រាអែលដកចេញការបិទច្រកលើការផ្គត់ផ្គង់ជំនួយ ស្របពេលការព្រមានថាជិតកើតមានគ្រោះទុរ្ភិក្សយ៉ាងណាក្តី នាយករដ្ឋមន្រ្តីអ៊ីស្រាអែលលោក Benjamin Netanyahu និយាយកាលពីសប្តាហ៍មុនថា អ៊ីស្រាអែលនឹងគ្រប់គ្រងតំបន់ហ្កាហ្សាទាំងមូល ។

ការិយាល័យសារព័ត៌មានហ្កាហ្សា រាយការណ៍ថា អ៊ីស្រាអែលដណ្តើមគ្រប់គ្រងដែនដីមួយនេះបានប្រហែល ៧៧ភាគរយតាមរយៈការវាយប្រហារជើងគោក ឬការបញ្ជាឲ្យជម្លៀសខ្លួន និងការទម្លាក់គ្រាប់បែក ធ្វើឲ្យជនប៉ាឡេស្ទីននៅឆ្ងាយពីផ្ទះសម្បែងរបស់ពួកគេ ៕