ក្នុងឱកាសចូលរួមកិច្ចប្រជុំកំពូលអាស៊ាន លើកទី៤៦ និងកិច្ចប្រជុំកំពូលពាក់ព័ន្ធ ទីក្រុង​គូឡា​ឡាំពួ​ ប្រទេសម៉ាឡេស៊ី នៅរសៀលថ្ងៃទី២៦ ខែឧសភា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជាបានអញ្ជើញចូលរួមជំនួបជាបន្តបន្ទាប់ រវាង​ប្រមុខ​ដឹក​នាំអាស៊ាន​, តំណាងអន្តរសភាអាស៊ាន, តំណាងយុវជនអាស៊ាន និងជំនួបក្រៅ​ផ្លូវ​ការ​ជា​មួយ​មេ​ដឹក​នាំ​អាស៊ានមួយចំនួនទៀត។

បន្ទាប់ពីបានចូលរួម កិច្ចប្រជុំកំពូលអាស៊ាន លើកទី៤៦ ក្រោមមូលបទ “បរិយាបន្ន និងចីរភាព" នៅ​ទី​ក្រុងគូឡាឡាំពួ នៅរសៀលថ្ងៃទី២៦ ខែឧសភា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបន្តចូលរួមក្នុងជំនួបរវាងប្រមុខដឹកនាំអាស៊ាន និង​តំណាង​អន្តរ​សភាអាស៊ាន, ជំនួបរវាងប្រមុខដឹកនាំអាស៊ាន និងតំណាងយុវជនអាស៊ាន, ចូលរួម​ក្នុង​ជំនួ​ប​រវាង​ប្រមុខ​ដឹកនាំអាស៊ាន និងតំណាងក្រុមហ៊ុនធុរកិច្ចអាស៊ានផងដែរ។

ក្រៅពីជំនួប​ផ្លូវ​ការទាំងនេះ សម្ដេចធិបតី នាយករដ្ឋមន្រ្ដី បានមានជំនួបដាច់​ដោយ​ឡែក​ជា​បន្ត​បន្ទាប់​ទៀត​ជាមួយមេដឹកនាំអាស៊ាន ក្នុងនោះ សម្ដេចបានអញ្ជើញជួបជាមួយ ឯកឧត្តម ដាតុ ស៊េរី អាន់វ៉ា អ៊ីប្រាហ៊ីម (Dato' Seri Anwar Ibrahim) នាយករដ្ឋមន្ត្រីម៉ាឡេស៊ី ក្នុងជំនួបទ្វេភាគី និង​ពិភាក្សាការងារ។

សម្ដេចក៏ឆ្លៀតពេលជួបសំណេះសំណាលប្រកបដោយភាពស្និទ្ធស្នាល ជាមួយ​ប្រមុខ​ថ្នាក់​ដឹកនាំ​នៃ​បណ្តា​ប្រទេស​អាស៊ាន​ រួមមានឯកឧត្តមនាយករដ្ឋមន្រ្តីម៉ាឡេស៊ី, ឯកឧត្តមនាយករដ្ឋមន្រ្តី នៃ​សាធារណៈ​រដ្ឋ​សង្គមនិយមវៀតណាម, ឯកឧត្តមនាយករដ្ឋមន្រ្តីសិង្ហបុរី, ឯកឧត្តម​ប្រធានា​ធិប​តី​ឥណ្ឌូ​ណេស៊ី, និងព្រះមហាក្សត្រនៃព្រុយណេដារូស្សាឡាម ក្នុងឱកាសចូលរួម​កិច្ច​ប្រជុំ​កំពូល​អាស៊ាន ​លើកទី៤៦ និងកិច្ចប្រជុំកំពូលពាក់ព័ន្ធ នៅប្រទេសម៉ាឡេស៊ី។

សម្ដេចក៏​បាន​ឆ្លៀតពេលជួបសំណេះសំណាលជាមួយ ឯកឧត្តម សនសៃ ស៊ីផាន់ដន (Sonexay Siphandone) នាយករដ្ឋមន្រ្តីនៃសាធារណរដ្ឋប្រជាធិបតេយ្យប្រជាមានិតឡាវ ក្នុងឱកាស​ចូល​រួម​កិច្ច​ប្រជុំកំពូលអាស៊ាន លើកទី៤៦ និងកិច្ចប្រជុំកំពូលពាក់ព័ន្ធ នៅប្រទេស​ម៉ាឡេស៊ី​នេះ​ផង​ដែរ​។

សូមជម្រាបថា សម្ដេចធិបតី ហ៊ុន ម៉ាណែត នាយករដ្ឋមន្រ្ដី និងលោកជំទាវបណ្ឌិត បាន​អញ្ជើញ​ដឹកនាំ​គណៈប្រតិភូជាន់ខ្ពស់កម្ពុជា ចូលរួមកិច្ចប្រជុំកំពូលអាស៊ានលើកទី៤៦ និងកិច្ចប្រជុំ​កំពូល​ពាក់ព័ន្ធ ចាប់ពីថ្ងៃទី២៥-២៧ ខែឧសភា ឆ្នាំ២០២៥ នៅទីក្រុងគូឡាឡាំពួ ប្រទេសម៉ាឡេស៊ី តប​តាម​ការ​អញ្ជើញរបស់ ឯកឧត្តម ដាតុ ស៊េរី អាន់វ៉ា អ៊ីប្រាហ៊ីម (Dato' Seri Anwar Ibrahim) នាយក​រដ្ឋមន្ត្រី នៃប្រទេសម៉ាឡេស៊ី និងជាប្រធាននៃកិច្ចប្រជុំកំពូលអាស៊ាន ឆ្នាំ ២០២៥។ 

កិច្ច​ប្រជុំ​កំពូលអាស៊ានលើកទី៤៦ ក្រោមប្រធានបទ “បរិយាបន្ន និងចីរភាព” ដែលនឹង​ផ្តោត​លើ​ការ​ជំរុញ​ការកសាងសហគមន៍អាស៊ាន និងអនុម័ត ចក្ខុវិស័យសហគមន៍អាស៊ានឆ្នាំ២០៤៥ ដែ​ល​ជា​ព្រឹត្តិការណ៍ដ៏សំខាន់មួយក្នុងការបញ្ជាក់ឡើងវិញពីការលើកកម្ពស់ ការប្តេជ្ញា​ចិត្ត​រួម​គ្នា​របស់​តំបន់​អាស៊ាន ដែលប្រកបដោយភាពធន់ នវានុត្តន៍ ថាមវន្ត និងផ្តោតលើប្រជាជនជាចម្បង៕