ប្រព័ន្ធផ្សព្វផ្សាយរដ្ឋបានរាយការណ៍ថា បេសកជនរបស់ប្រទេសបារាំង ប្រចាំនៅទីក្រុងតេអេរ៉ង់ ត្រូវបានកោះអញ្ជើញ កាលពីថ្ងៃអាទិត្យ (ទី២៥ ខែឧសភា) ជុំវិញការអត្ថាធិប្បាយក្នុងន័យ «ប្រមាថ» ពីសំណាក់រដ្ឋមន្ត្រីការបរទេសបារាំង បន្ទាប់ពីភាពយន្តរបស់អ៊ីរ៉ង់ បានឈ្នះពានរង្វាន់ដ៏មានកិត្តិយសបំផុត នៅឯមហោស្រពភាពយន្តអន្តរជាតិទីក្រុងកាន (Cannes)។

គួរបញ្ជាក់ថា តាមរយៈការប្រកាសនៅលើបណ្ដាញសង្គម X បន្ទាប់ពីផលិតករភាពយន្តមាននិន្នាការប្រឆាំង គឺលោក Jafar Panahi បានឈ្នះពានរង្វាន់ Palme d'Or កាលពីថ្ងៃទី២៤ ខែឧសភា លោក Jean-Noel Barrot បានហៅជ័យជម្នះរបស់អ្នកផលិតយន្តរូបនេះថា ជា «កាយវិការនៃការតស៊ូប្រឆាំងនឹងការគៀបសង្កត់របស់របបអ៊ីរ៉ង់»។

លោក Panahi វ័យ ៦៤ឆ្នាំ បានទទួលរង្វាន់ Palme d'Or សម្រាប់ខ្សែភាពយន្តមានចំណងជើង «It Was Just a Accident» ជាខ្សែភាពយន្តដែលជនជាតិអ៊ីរ៉ង់ ៥នាក់ ប្រឈមជាមួយបុរសម្នាក់ដែលពួកគេជឿថា បានធ្វើទារុណកម្មពួកគេនៅក្នុងពន្ធនាគារ។

តារាភាពយន្តជានារីមួយចំនួន ក៏លេចមុខនៅក្នុងខ្សែភាពយន្តនេះដោយមិនពាក់ស្បៃមុខផងដែរ ដែលជាការបំពានលើក្រមសម្លៀកបំពាក់ដ៏តឹងរ៉ឹងរបស់ប្រទេសអ៊ីរ៉ង់ ចំពោះស្ត្រី។

ទីភ្នាក់ងារសារព័ត៌មានរដ្ឋ Irna បានរាយការណ៍កាលពីថ្ងៃទី២៥ ខែឧសភាថា៖ «បន្ទាប់ពីមានការលើកឡើងក្នុងន័យប្រមាថ និងការចោទប្រកាន់គ្មានមូលដ្ឋានពីសំណាក់រដ្ឋមន្ត្រីបារាំង ភារធារីនៃប្រទេសនេះ ប្រចាំនៅទីក្រុងតេអេរ៉ង់ ត្រូវបានកោះអញ្ជើញ»។

សារព័ត៌មាននេះ បានឲ្យដឹងបន្ថែមថា អ៊ីរ៉ង់ថ្កោលទោស «ការឆ្លៀតប្រើប្រាស់ដោយមិនត្រឹមត្រូវរបស់រដ្ឋាភិបាលបារាំង» នូវមហោស្រពភាពយន្តអន្តរជាតិទីក្រុងកាន «ដើម្បីជំរុញរបៀបវារៈនយោបាយរបស់ខ្លួន ប្រឆាំងនឹងសាធារណរដ្ឋឥស្លាម»៕