ប្រភពជាន់ខ្ពស់ ៣រូបពីរុស្សី បានប្រាប់សារព័ត៌មាន Reuters ថា ប្រទេសរុស្ស៊ីមិនមើលឃើញបុរីវ៉ាទីកង់ជាទីកន្លែងប្រាកដប្រជា សម្រាប់កិច្ចចរចាសន្តិភាពជាមួយអ៊ុយក្រែននោះឡើយ ពីព្រោះ Holy See (ស្ថាប័នរដ្ឋបាលវិហារកាតូលិក) គឺជាអាសនៈរបស់អ្នកកាន់សាសនាគ្រិស្ត ហើយត្រូវបានហ៊ុមព័ទ្ធដោយប្រទេសអ៊ីតាលី ដែលទាំងជាសមាជិករបស់អង្គការណាតូ (NATO) និងសហភាពអឺរ៉ុប (EU)។

ពួកគេក៏ចង្អុលបង្ហាញផងដែរថា មន្ត្រីរុស្ស៊ីជាច្រើនមិនអាចសូម្បីតែធ្វើដំណើរទៅកាន់ទៅទីនោះ ដោយសារតែការរឹតបន្តឹងរបស់លោកខាងលិច។

គួរបញ្ជាក់ថា រហូតមកដល់ពេលនេះ បុរីវ៉ាទីកង់បានអត្ថាធិប្បាយអ្វីជាសាធារណៈឡើយ ពាក់ព័ន្ធនឹងគំនិតលើកឡើងដោយប្រធានាធិបតីអាមេរិក លោក Donald Trump បន្ទាប់ពីមានការជជែកតាមទូរសព្ទជាមួយប្រធានាធិបតីរុស្ស៊ី លោក Vladimir Putin ដែលថា សម្ដេច ប៉ាប ឡេអូទី១៤ (Pope Leo XIV) អាចធ្វើជាម្ចាស់ផ្ទះ សម្រាប់កិច្ចពិភាក្សា ដែលមានគោលបំណងបញ្ចប់ជម្លោះដ៏អាក្រក់បំផុតរបស់អឺរ៉ុប គិតចាប់តាំងពីសង្គ្រាមលោកលើកទី២។

ហើយនាយករដ្ឋមន្ត្រីអ៊ីតាលី លោកស្រី Giorgia Meloni បាននិយាយកាលពីសប្តាហ៍មុនថា សម្តេច ប៉ាប ឡេអូទី១៤ ដែលជាសម្តេចប៉ាបដំបូងគេមានដើមកំណើតនៅសហរដ្ឋអាមេរិក បានបញ្ជាក់ពីឆន្ទៈរបស់ព្រះអង្គ ក្នុងការធ្វើជាម្ចាស់ផ្ទះ សម្រាប់កិច្ចពិភាក្សានានា ក្នុងអំឡុងពេលមានព្រះបន្ទូលតាមទូរសព្ទជាមួយលោកស្រី។

តែយ៉ាងណាក្ដី ដោយនិយាយក្នុងលក្ខខណ្ឌមិនបញ្ចេញឈ្មោះ ដោយសារភាពរសើបនៃបញ្ហានេះ ប្រភពរុស្ស៊ីជាន់ខ្ពស់ម្នាក់ដែលដឹងពីការគិតរបស់វិមានក្រឹមឡាំង បានប្រាប់ថា៖ «បុរីវ៉ាទីកង់មិនត្រូវបានមើលឃើញនៅក្នុងប្រទេសរុស្ស៊ីថា ជាកម្លាំងប្រាកដប្រជា ដែលមានសមត្ថភាពក្នុងការដោះស្រាយជម្លោះដ៏ស្មុគស្មាញនោះឡើយ»។

ក្នុងចំណោមហេតុផលដែលត្រូវបានលើកឡើងដោយប្រភពទាំង៣ គឺការណ៍ដែលថា ទាំងរុស្ស៊ី និងអ៊ុយក្រែន ជាប្រទេសកាន់សាសនាគ្រិស្តនិកាយអូស្សូដក់ខាងកើតដោយភាគច្រើ ខណៈដែលបុរីវ៉ាទីកង់ត្រូវបានហ៊ុមព័ទ្ធដោយសមាជិករបស់អង្គកាណាតូ គឺអ៊ីតាលីដែលបានគាំទ្រអ៊ុយក្រែន និងដាក់ទណ្ឌកម្មម្តងហើយម្តងទៀតលើរុស្ស៊ី៕