​បាល់ទាត់៖ ​ក្រុម​ហង្ស​ក្រហម Liverpool មិន​របូត​បី​ពិន្ទុ​ឡើយ​នៅពេល​ទទួលភ្ញៀវ​សារិកា​ព្រៃ Newcastle ដោយ​យកឈ្នះ​ក្នុង​លទ្ធផល ៣-១​។ ​​Liverpool ដែល​អវត្តមាន Virjil van Dijk និង Fabinho ដោយសារ​តេស្ត​វិជ្ជមាន Covid-19 នោះចាប់ផ្តើម​ដំបូង​ត្រូវ​ក្រុម​ភ្ញៀវ Newcastle បើក​ការនាំ​មុខមុន​តាំងពី​នាទី​ទី៧ ដោយ​អតីត​កីឡាករ​របស់ Liverpool, Jonjo Shelvey​។

​យ៉ាងណាក្តី​ក្រុម​ម្ចាស់ផ្ទះ Liverpool ឆ្លើយតប​ភ្លាមៗ​ក្នុង​វគ្គ​ទី១ នៅពេល​ខ្សែប្រយុទ្ធ​ព័រទុយហ្កាល់ Diogo Jota តាម​ស្មើ​នៅ​នាទី​ទី២១ មុនពេល​ដែល Mohamed Salah ស៊ុត​នាំមុខ​លើកដំបូង​នៅ​នាទី​ទី២៧ ដែលជា​គ្រាប់​បាល់​ទី២២ របស់​ខ្សែប្រយុទ្ធ​អេ​ហ្ស៊ីប​រូបនេះ​រដូវ​កាល​នេះ​។ ​​ក្រុម​របស់លោក Jurgen Klopp ត្រូវ​រង់ចាំ​ដល់​នាទី​ទី៨៧ ទើប​អាច​រក​គ្រាប់​បាល់​ធា​នាបី​ពិន្ទុ​បាន​ដោយ​ខ្សែការពារ Trent Alexander-Arnold​។ ​ជ័យជំនះ​នេះ​ធ្វើឱ្យ Liverpool បន្ត​ឈរ​លេខ២ ក្នុង​តារាង​មាន ៤០ពិន្ទុ​ដេញ​ពីក្រោយ​ក្រុម​កំពូល​តារាង Manchester City ១ពិន្ទុ​។

​​ចំណែក​មួយគូ​ទៀត​យប់មិញ Chelsea បាន​ខកខាន​បី​ពិន្ទុ​ក្នុង​ទឹកដី​ខ្លួនឯង​ក្រោយពេល​ស្មើនឹង​ក្រុម​ភ្ញៀវ Everton ១-១​។ ​​គ្រាប់​បាល់​ទាំងពីរ​គ្រាប់​ក្នុងការ​ប្រកួត​ត្រូវ​រង់ចាំ​ដល់​នាទី​ទី៧០ ពោលគឺ​ម្ចាស់ផ្ទះ​នាំមុខ​មុន​ដោយ Mason Mount តែ​មិនយូរ​ទេ ៤នាទី​ក្រោយមក Everton ក៏​តាម​ស្មើ​វិញ​ដោយ​ខ្សែការពារ Jarrad Branthwaite​។ ​​បើទោះជា​មានឱកាស​គ្រប់គ្រង​បាល់​ដល់​ទៅ ៨០% ក្នុងការ​ប្រកួត Chelsea មិនអាច​រក​គ្រាប់​ជ័យជំនះ​បានឡើយ​ ខណៈ ១-១ រក្សា​ដល់​ចប់​ការប្រកួត​មានន័យថា​ ក្រុម​របស់លោក Thomas Tuchel ត្រូវ​ដេញ​ពីក្រោយ Liverpool ៣ពិន្ទុ និង ៤ពិន្ទុ​ពីក្រោយ​ក្រុម​កំពូល​តារាង Manchester City៕

​អត្ថបទ​៖​នាង សុភា​វុ​ធ