អ្នកនាំពាក្យវិមានក្រឹមឡាំង លោក Dmitry Peskov នៅថ្ងៃចន្ទ (ទី២៦ ខែឧសភា) នេះ បាននិយាយថា ការធ្វើការងារយ៉ាងធ្ងន់ធ្ងរ ស្ដីពីសំណើរបស់រុស្ស៊ី សម្រាប់លទ្ធភាពដែលមានកិច្ចព្រមព្រៀងសន្តិភាព ក្នុងសង្គ្រាម នៅអ៊ុយក្រែន កំពុងដំណើរការទៅ ហើយសេចក្តីព្រាងមិនទាន់ត្រូវបានដាក់ជូននៅឡើយទេ។

គួរដឹងថា អំឡុងពេលសន្ទនាតាមទូរសព្ទជាមួយប្រធានាធិបតីអាមេរិក លោក Donald Trump កាលពីសប្តាហ៍មុន ប្រធានាធិបតីរុស្ស៊ី លោក Vladimir Putin បាននិយាយថា រុស្ស៊ី និងអ៊ុយក្រែន នឹងធ្វើការលើអនុស្សរណៈមួយ ទាក់ទងនឹងកិច្ចព្រមព្រៀងសន្តិភាព ជាការលើកឡើងដែលបានជំរុញឲ្យមានការចោទប្រកាន់ថ្មីពីទីក្រុងគីវ និងរដ្ឋាភិបាលអឺរ៉ុប ដែលថា ទីក្រុងមូស្គូ កំពុងពន្យារពេលវេលា និងមិនបានចំណាប់អារម្មណ៍យ៉ាងប្រាកដប្រជានោះឡើយ ចំពោះសន្តិភាព។

រុស្ស៊ីបានច្រានចោលការចោទប្រកាន់បែបនេះ ហើយលើកឡើងដដែលៗថា ខ្លួនមិនមានបំណងពន្យារដំណើរការសន្តិភាពនោះទេ។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «សេចក្តីព្រាងនៃអនុស្សរណៈរបស់រុស្ស៊ី មិនទាន់ត្រូវបានដាក់ជូននៅឡើយទេ។ ការងារកំពុងបន្តធ្វើ។ នេះគឺជាសេចក្តីព្រាងដ៏ប្រាកដប្រជា ពោលគឺជាសេចក្តីព្រាងនៃឯកសារច្បាស់លាស់ ដែលតម្រូវឲ្យមានការត្រួតពិនិត្យ និងការរៀបចំយ៉ាងប្រុងប្រយ័ត្ន»។

ចំណែករដ្ឋមន្ត្រីការបរទេសរុស្ស៊ី លោក Sergei Lavrov បានប្រាប់កាលពីថ្ងៃសុក្រថា ទីក្រុងមូស្គូនឹងត្រៀមរួចជាស្រេច ដើម្បីប្រគល់ឲ្យទីក្រុងគីវនូវសេចក្តីព្រាងឯកសារដែលបញ្ជាក់ពីលក្ខខណ្ឌ សម្រាប់កិច្ចព្រមព្រៀងសន្តិភាពរយៈពេលវែង នៅពេលដែលការផ្លាស់ប្តូរអ្នកទោស ដែលត្រូវបានព្រមព្រៀងគ្នា អំឡុងកិច្ចពិភាក្សា នៅទីក្រុងអ៊ីស្តង់ប៊ុល ត្រូវបានបញ្ចប់៕