ប្រធានមន្ទីរពេទ្យ ២កន្លែង បាននិយាយប្រាប់ BBCថា ជនប៉ាឡេស្ទីនយ៉ាងហោច ៥៤នាក់ ត្រូវបានសម្លាប់អំឡុងការវាយប្រហារ ២លើកដាច់ដោយឡែកពីគ្នារបស់អ៊ីស្រាអែល រួមទាំងការវាយប្រហារលើសាលារៀនជាទីជម្រកសម្រាប់គ្រួសារជម្លៀសខ្លួននៅភាគកណ្តាលតំបន់ហ្កាហ្សា ។

សាលារៀន Fahmi Al-Jargawi ស្ថិតនៅទីក្រុងហ្កាហ្សា ក្លាយជាទីជម្រកសម្រាប់មនុស្សរាប់រយនាក់មកពីទីក្រុង Beit Lahia ដែលបច្ចុប្បន្នស្ថិតក្រោមការវាយប្រហារយ៉ាងខ្លាំងក្លាពីយោធាអ៊ីស្រាអែល ។

អ្នកនាំពាក្យក្រុមការពាស៊ីវិលគ្រប់គ្រងដោយក្រុមម៉ាសនៅតំបន់ហ្កាហ្សា និយាយថា សាកសពមនុស្ស ២០នាក់ រួមទាំងកុមារដែរនោះ ត្រូវបានរកឃើញ ដែលភាគច្រើននៃពួកគេ រងការឆាបឆេះធ្ងន់ធ្ងរ ក្រោយអគ្គិភ័យឆាបឆេះថ្នាក់រៀន ២បន្ទប់ ដែលធ្វើជាកន្លែងស្នាក់នៅ ។

យោធាអ៊ីស្រាអែល និយាយថា ពួកគេវាយប្រហារគោលដៅទីបញ្ជាការ និងគ្រប់គ្រងរបស់ក្រុមហាម៉ាស និងក្រុមអ៊ិស្លាមជីហាដ ។

ពួកគេនិយាយថា តំបន់នោះត្រូវបានប្រើប្រាស់ដោយក្រុមភេរវកម្ម ដើម្បីរៀបចំផែនការវាយប្រហារជនស៊ីវិលអ៊ីស្រាអែល និងទាហាន IDF ហើយនិងបានចោទប្រកាន់ក្រុមហាម៉ាសថាប្រើប្រាស់ពលរដ្ឋហ្កាហ្សាជាខែលមនុស្ស ។

លោក Rami Rafiq គឺជាពលរដ្ឋមួយរូបរស់នៅក្នុងសាលារៀននោះ និយាយថា អណ្តាតភ្លើងមាននៅគ្រប់ទីកន្លែង លោកបានឃើញសាកសពឆាបឆេះរាយប៉ាយពាសពេញដី ។ កូនប្រុសរបស់លោកស្លុតចិត្តពេលឃើញទិដ្ឋភាពដ៏គួរឲ្យភ័យខ្លាចបែបហ្នឹង ៕