ក្រសួងការបរទេសហ្វាំងឡង់ នៅថ្ងៃចន្ទ (ទី២៦ ខែឧសភា) នេះ បានប្រាប់ឲ្យដឹងថា ខ្លួនបានកោះអញ្ជើញឯកអគ្គរដ្ឋទូតរបស់រុស្ស៊ី ប្រចាំនៅទីក្រុង Helsinki ជុំវិញការសង្ស័យថា មានការរំលោភលើដែនអាកាសហ្វាំងឡង់ដែលបានកើតឡើង កាលពីសប្តាហ៍មុន។

ហ្វាំងឡង់ ដែលជាប្រទេសសមាជិករបស់អង្គការណាតូ (NATO) បានលើកឡើងកាលពីថ្ងៃសុក្រសប្ដាហ៍កន្លងមកថា ខ្លួនជឿថា យន្តហោះយោធារុស្ស៊ី ២គ្រឿង បានចូលដែនអាកាសរបស់ខ្លួន នៅឆ្នេរ Porvoo ភាគខាងត្បូងនៃប្រទេសអឺរ៉ុបខាងកើត ហើយថា ឆ្មាំល្បាតព្រំដែនហ្វាំងឡង់ កំពុងស៊ើបអង្កេតពីឧប្បត្តិហេតុនេះ។

នៅក្នុងសេចក្តីថ្លែងការណ៍មួយផ្ញើទៅកាន់សារព័ត៌មាន Reuters ក្រសួងការបរទេសហ្វាំងឡង់បានឲ្យដឹងថា៖ «ឯកអគ្គរដ្ឋទូតត្រូវបានប្រាប់ថា ប្រទេសហ្វាំងឡងសង្ស័យមានការរំលោភដែនដីធ្ងន់ធ្ងរ»។

ក្រសួងបានបន្ថែមដោយមិនបានបញ្ជាក់ព័ត៌មានលម្អិតថា លោកឯកអគ្គរដ្ឋទូតបានបញ្ជាក់ថា លោកនឹងបញ្ជូនសារនេះបន្ត។ ស្ថានទូតរុស្ស៊ី ប្រចាំនៅទីក្រុង Helsinki មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

គួរបញ្ជាក់ថា តំបន់សមុទ្របាល់ទិក ស្ថិតក្នុងការប្រុងប្រយ័ត្នខ្ពស់ បន្ទាប់ពីមានការដាច់ខូចខាតខ្សែថាមពល តំណភ្ជាប់ទូរគមនាគមន៍ និងបំពង់បង្ហូរឧស្ម័ន ចាប់តាំងពីរុស្ស៊ីបានលុកលុយអ៊ុយក្រែន ក្នុងឆ្នាំ២០២២ ដោយសម្ព័ន្ធមិត្តអង្គការណាតូបានបង្កើនវត្តមានរបស់ខ្លួន នៅក្នុងតំបន់នេះ ជាមួយនឹងនាវាចម្បាំង យន្តហោះ និងយានដ្រូនរបស់កងទ័ពជើងទឹក៕