លោក Claude គឺជាជនភៀសខ្លួនកុងហ្គោមួយរូបព្រួយបារម្ភថា លោកអាចនឹងត្រូវស្លាប់ក្នុងពេលដ៏ខ្លីខាងមុខនេះ ដោយសារភាពអត់ឃ្លាន ឬអំពើហិង្សា ពេលដែលលោករង់ចាំនៅសំពត់តង់ចែកចាយអាហារ ស្ថិតក្នុងជំរំជនភៀសខ្លួននៅប្រទេសប៊ូរុនឌី ។

លោកស្ថិតក្នុងចំណោមជនភៀសខ្លួនកុងហ្គោរាប់ម៉ឺននាក់ជាប់ខ្លួនក្នុងជម្លោះដ៏ឃោឃៅនៅទូទាំងតំបន់ព្រំដែន និងការកាត់បន្ថយជំនួយស្បៀងអាហារអន្តរជាតិធ្ងន់ធ្ងរ ។

លោក Claude ដែលមកពីទីក្រុង Uvira សាធារណរដ្ឋប្រជាធិបតេយ្យកុងហ្គោ បានរត់ភៀសខ្លួន ក្រោយអំពើហិង្សាផ្ទុះឡើងនៅតំបន់ភាគខាងកើតប្រទេស បង្កឡើងដោយសារការរុលចូលយ៉ាងឆាប់រហ័សរបស់ក្រុមឧទ្ទាម M23គាំទ្រដោយប្រទេសរ៉្វាន់ដា ។

លោកបានរត់គេចឆ្លងកាត់ព្រំដែនចូលទៅក្នុងប្រទេសប៊ូរុនឌីកាលពីខែកុម្ភៈ ។ លោកនិយាយថា ក្រុមប្រដាប់អាវុធបានបាញ់សម្លាប់គ្នា ចាប់រំលោភសេពសន្ថវៈលើស្រ្តី ។

នៅក្នុងជំរំ Musenyi ដែលមានមនុស្សរស់នៅលើសចំណុះ លោក Claude ប្រឈមនឹងការលំបាកជាច្រើន ពេលដែលរបបអាហារថយចុះ ។

ភាពស្រេកឃ្លាន បានបង្កភាពតានតឹងថ្មីនៅក្នុងជំរំ បង្ខំឲ្យលោក Claude ចូលរួមជាមួយក្រុមស្ម័គ្រចិត្តដែលបានល្បាតក្នុងតំបន់ ដើម្បីការពារករណីចោរលួចជំនួយផ្គត់ផ្គង់នៅសល់ ៕