អ្នកនាំពាក្យក្រសួងការបរទេសទីក្រុងតេអេរ៉ង់ (Tehran) បានប្រាប់ទូរទស្សន៍ CNN ថា អ៊ីរ៉ង់បើកចំហរក្នុងការសម្របសម្រួលលើកម្មវិធីនុយក្លេអ៊ែររបស់ខ្លួនក្នុងការពិភាក្សាជាមួយសហរដ្ឋអាមេរិក ប៉ុន្តែការចម្រាញ់សារធាតុអ៊ុយរ៉ានីញ៉ូមនៅតែមិនអាចចរចារបាន ដោយបង្ហាញថា ទីក្រុងវ៉ាស៊ីនតោនត្រូវយល់ពីគោលជំហរនេះ ។

លោក Esmail Baghaei អ្នកនាំពាក្យក្រសួងការបរទេសអ៊ីរ៉ង់បាននិយាយក្នុងទីក្រុងតេអេរ៉ង់កាលពីថ្ងៃចន្ទដើមសប្ដាហ៍នេះថា ប្រសិនបើមានចេតនាចង់ធ្វើឲ្យប្រាកដថាកម្មវិធីនុយក្លេអ៊ែររបស់អ៊ីរ៉ង់នឹងមិនត្រូវបានបំពាក់ដោយអាវុធនោះ លោកគិតថានោះជាអ្វីដែលពួកលោកអាចធ្វើបានយ៉ាងងាយ។

នៅពេលត្រូវបានសួរដោយទូរទស្សន៍ CNN ថាតើត្រូវធ្វើយ៉ាងណាដើម្បីឲ្យការសម្របសម្រួលអាចឈានដល់ក្នុងកិច្ចពិភាក្សាបាននោះ លោក Baghaei និយាយថាមានវិធីជាច្រើន ដោយមិនបានបញ្ជាក់ច្បាស់។

ទោះយ៉ាងណាក៏ដោយ លោកបានបន្ថែមថា សិទ្ធិរបស់អ៊ីរ៉ង់ចំពោះថាមពលនុយក្លេអ៊ែរ នឹងត្រូវទទួលបានការការពារ ដោយបានគាំទ្រជំហររបស់អ៊ីរ៉ង់ជាយូរមកហើយលើកិច្ចពិភាក្សានានា។លោកបានបន្ថែមថា ប្រសិនបើចេតនារបស់សហរដ្ឋអាមេរិក គឺដកហូតសិទ្ធិរបស់ប្រជាជនអ៊ីរ៉ង់ក្នុងការប្រើប្រាស់ថាមពលនុយក្លេអ៊ែរដោយសន្តិវិធី លោកគិតថានោះនឹងមានបញ្ហាយ៉ាងខ្លាំងដល់កម្រិតដែលលោកគិតថាពិតជានឹងប្រឈមទៅនឹងដំណើរការទាំងមូល ។ 

អ៊ីរ៉ង់និយាយថាខ្លួនអាចចម្រាញ់សារធាតុអ៊ុយរ៉ានីញ៉ូមបាន ប្រសិនបើការចរចានុយក្លេអ៊ែររបស់អាមេរិកបញ្ចប់ដោយគ្មានកិច្ចព្រមព្រៀង ខណៈលោកTrump គំរាមដាក់ទណ្ឌកម្មសេដ្ឋកិច្ច ដែលមានស្រាប់បន្ថែមទៀត និងវាយប្រហារបើគ្មានកិច្ចព្រមព្រៀងថ្មីណាមួយត្រូវបានឈានដល់។

បន្ទាប់ពីកិច្ចចរចារវាងសហរដ្ឋអាមេរិក និងអ៊ីរ៉ង់ បានបោះជំហានឈានទៅមុខជាមួយនឹងការចរចាជុំទីប្រាំនៅទីក្រុងរ៉ូម ប្រទេសអ៊ីតាលី កាលពីថ្ងៃសុក្រ លោកប្រធានាធិបតី Donald Trump បានសម្តែងសុទិដ្ឋិនិយមកាលពីថ្ងៃអាទិត្យថាវឌ្ឍនភាពកំពុងត្រូវបានបង្កើតឡើង៕