សហរដ្ឋអាមេរិក កាលពីថ្ងៃចន្ទ បានច្រានចោលការអះអាងដោយក្រុមហាម៉ាសថាក្រុមនេះបានទទួលយកសំណើបទឈប់បាញ់នៅតំបន់ហ្កាហ្សា ដែលតាមសេចក្តីរាយការណ៍ថាពាក់ព័ន្ធនឹងការដោះលែងចំណាប់ថ្នូរ១០នាក់ជាពីរក្រុម និងបទឈប់បាញ់រយៈពេល៧០ថ្ងៃ។

មន្ត្រីប៉ាឡេស្ទីនម្នាក់ ដែលស្និទ្ធនឹងក្រុមហាម៉ាស បាននិយាយថា ក្រុមនេះបានព្រមព្រៀងលើសំណើររបស់បេសកជនពិសេសសហរដ្ឋអាមេរិក លោក Steve Witkoff សម្រាប់បទឈប់បាញ់នៅតំបន់ហ្កាហ្សា ដែលត្រូវបានទទួលដោយក្រុមហាម៉ាស តាមរយៈអ្នកសម្របសម្រួល។

ប្រភពពីក្រុមហាម៉ាស បានប្រាប់សារព័ត៌មាន AFP ថាក្រុមនេះបាន «ព្រមព្រៀងចំពោះសំណើថ្មី» ធ្វើឡើងដោយសហរដ្ឋអាមេរិក ដែលចំណាត់ការនេះបានទទួលពីអ្នកសម្របសម្រួល»។ ប៉ុន្តែការរាយការណ៍ដោយសារព័ត៌មាន Axios ដែលត្រូវបានបញ្ជាក់ទៅកាន់សារព័ត៌មាន AFP ដោយអ្នកនាំពាក្យរបស់ លោក Witkoff បាននិយាយថា បេសកជនអាមេរិក បានជំទាស់ថាក្រុមសកម្មប្រយុទ្ធប៉ាឡេស្ទីនពុំបានយល់ព្រមតាមសំណើរបស់លោកទេ។

អ្នកសារព័ត៌មានរបស់ Axios លោក Barak Ravid បាននិយាយនៅលើបណ្តាញ X. ថា «បេសកជនសេតវិមាន លោក Steve Witkoff បានច្រានចោលការអះអាងរបស់ក្រុមហាម៉ាស ដែលថាក្រុមនេះបានព្រមព្រៀងលើសំណើរបស់លោកសម្រាប់កិច្ចព្រមព្រៀងចំណាប់ថ្នូរ និងបទឈប់បាញ់»។ លោកបានដកស្រង់សម្តីរបស់បេសកជនអាមេរិកដោយនិយាយថា «អ្វីដែលខ្ញុំបានឃើញពីក្រុមហាម៉ាស គឺជាការខកចិត្ត និងមិនអាចទទួលយកបានទាំងស្រុង»។ ប្រភពព័ត៌មានពីក្រុមហាម៉ាស បាននិយាយថា កិច្ចព្រមព្រៀងនេះរួមមាន «បទឈប់បាញ់រយៈពេល៧០ ថ្ងៃ ជាថ្នូរទៅនឹងការដោះលែងចំណាប់ថ្នូរ១០នាក់ជាពីរក្រុម ហើយក្នុងអំឡុងពេលបទឈប់បាញ់ ការចរចានឹងចាប់ផ្តើមលើបទឈប់បាញ់អចិន្ត្រៃយ៍ដោយមានការធានារបស់សហរដ្ឋអាមេរិក»។ សហរដ្ឋអាមេរិក អេហ្ស៊ីប និងប្រទេសកាតា សុទ្ធតែបានចូលរួមក្នុងការសម្របសម្រួលកិច្ចចរចាបទឈប់បាញ់សម្រាប់សង្រ្គាម។ លោក Witkoff ក៏បានចូលរួមក្នុងការចរចាកាលពីពេលមុន ដែលបានឈាន ដល់កិច្ចព្រមព្រៀងបទឈប់បាញ់ចុងក្រោយ។