ប្រធានាធិបតីអាមេរិក លោក Donald Trump បាននិយាយកាលពីថ្ងៃចន្ទ (២៦ ឧសភា) ថា លោកកំពុងពិចារណាបង្វែរប្រាក់ជំនួយចំនួន ៣ពាន់លានដុល្លារ ដែលបានផ្តល់កាលពីមុនសម្រាប់ការស្រាវជ្រាវវិទ្យាសាស្ត្រ និងវិស្វកម្ម ចេញពីសាកលវិទ្យាល័យ Harvard ហើយផ្តល់ឱ្យទៅសាលាពាណិជ្ជកម្មផ្សេងទៀតជំនួសវិញ។

ការអត្ថាធិប្បាយរបស់លោកលើបណ្ដាញសង្គម Truth Social នេះ បានកើតឡើងតិចជាងមួយសប្តាហ៍ប៉ុណ្ណោះ បន្ទាប់ពីរដ្ឋបាលរបស់លោកស្វះស្វែងរកវិធានការហាមប្រាមសាកលវិទ្យាល័យដ៏ល្បីល្បាញមួយនេះមិនឱ្យចុះឈ្មោះនិស្សិតបរទេស ជាផ្នែកមួយនៃកិច្ចខិតខំប្រឹងប្រែងមិនធម្មតារបស់លោក Trump ដើម្បីវាតទីយកការគ្រប់គ្រងរបស់រដ្ឋាភិបាលមួយចំនួនទៅដាក់លើបណ្ឌិតសភាអាមេរិក។

លោក Trump ដែលមកពីបក្សសាធារណរដ្ឋ បានបង្កកប្រាក់ជំនួយសហព័ន្ធ ៣ពាន់លានដុល្លាររបស់សាកលវិទ្យាល័យ Harvard ក្នុងប៉ុន្មានសប្តាហ៍ថ្មីៗ ដោយត្អូញត្អែរថា ស្ថាប័នអប់រំនេះបានជួលសមាជិកបក្សប្រជាធិបតេយ្យ "ឆ្វេងនិយមជ្រុលដ៏ឆ្គួតលីលា និង "ខួរក្បាលសត្វបក្សី" ឱ្យធ្វើជាសាស្រ្តាចារ្យ។ Harvard ដែលជាសាកលវិទ្យាល័យឯកជន បានប្តឹងតបតវិញដើម្បីស្តារមូលនិធិ ដោយនិយាយថា ការបង្កកនេះគឺជាការវាយប្រហាររដ្ឋធម្មនុញ្ញលើសេរីភាពបញ្ចេញមតិរបស់ខ្លួន និងមិនស្របច្បាប់ឡើយ។

សកម្មភាពដ៏ចម្រូងចម្រាសនេះគឺជាការកើនឡើងចុងក្រោយបង្អស់នៅក្នុងសមរភូមិដ៏ក្ដៅគគុករវាងសាលា Harvard និងសេតវិមាន ខណៈលោក Trump ព្យាយាមបង្ខំសាកលវិទ្យាល័យ ក្រុមហ៊ុនច្បាប់ ប្រព័ន្ធផ្សព្វផ្សាយ តុលាការ និងស្ថាប័នផ្សេងទៀត ឱ្យដើរស្របតាមរបៀបវារៈរបស់លោក។ ប្រធានាធិបតីរូបនេះ និងអ្នកសាធារណរដ្ឋផ្សេងទៀត បានចោទសាកលវិទ្យាល័យ Harvard ជាយូរមកហើយថា មានភាពលំអៀងឆ្វេងនិយមជ្រុល៕